Question:
raj'at ke alfaaz
Answer:
Kya farmaate hain 'ulamaa-e-deen wa muftiyaan-e-shar'e mateen darja-e-zail masale mein: Zaid ne apni beewi ko ek talaaq diya. Agle din panchaayat baithi, jismein Zaid ne kaha ki "agar meri beewi mere saath rehna chaahti hai, to main bhi usko rakhna chaahta huu.n." Is baat ko 9 saal guzar chuke hain. Kya Zaid ki beewi ab bhi Zaid hi ki beewi hai? Ya unka rishta khatam ho gaya hai? ﷽ Al-Jawaab: Yeh kehna ki "agar meri beewi mere saath rehna chaahti hai, to main bhi usko rakhna chaahta huu.n" raj'at ke alfaaz nahi.n hain, balki apne iraade ka izhaar hai, jisse raj'at saabit nahi.n hoti. Zaid ki beewi par ek talaaq pad chuki aur 'iddat bhi guzar gai, ab Zaid ki mutallaqa beewi aazaad hai, jahaa.n chaahe nikaah kar sakti hai. Agar chaahe to Zaid se bhi nikaah kar sakti hai, lekin Zaid se nikaah karne ki suurat mein Zaid ko sirf 2 talaaq ka ikhtiyaar hoga. Wallaahu Ta’aala A‘lam Farooq Khan Al-Muhaaimi Date: 18 Rabi-ul-Awwal 1445H / 4 October 2023 Transliteration: Faiz Ashrafi