اسلام نے خالقِ کائنات کی عبادت وبندگی کے ساتھ مخلوقِ خدا کے ساتھ حسنِ اخلاق کا جو تصور پیش کیا ہے اس کی مثال کسی دوسرے مذہب میں نہیں ملتی یہاںتک کہ اسلام میں جو عبادتیں فرض ہیں ان میں بھی حسنِ اخلاق کا جلوہ دکھائی دیتا ہے چنانچہ اہم الفرائض نمازکے فوائد میں ایک فائدہ یہ بھی ہے کہ وہ بے حیائی اور بری باتوں سے باز رکھتی ہے۔ روزے کے متعلق بتایاگیا ہے کہ وہ تقویٰ کی تعلیم دیتا ہے اور بھوکوں اور پیاسوں کے دکھ درد سمجھنے میں معاون ومددگار ہے۔ زکوٰۃ کی ادائیگی میں یہ راز پنہاں ہے کہ مال ودولت سے محروم اور غربا وفقرا کی ضروریاتِ زندگی اس سے بحسن وخوبی انجام پاسکیں گویا اس میں انسانی خیر خواہی اور غم خواری کا سبق ہے اور حج میں بھی انسانی وحدت اور حسن اخلاق کی تعلیم ہے گویا اسلام کی اصل روح حسنِ اخلاق ہی ہے۔ انسان جب اس دنیا میں آنکھ کھولتا ہے تو اسے سب سے زیادہ انسانوں سے ہی واسطہ پڑتا ہے۔ انسان اپنی زندگی کے جس مرحلے میں بھی ہو دوسرے انسانوں سے اس کے تعلقات ضرور ہوتے ہیں۔ اس لیے اسلام جو کہ دین فطرت ہے اس نے انسانی طبیعت ومزاج کے مطابق حسنِ اخلاق کی ایسی تعلیم دی ہے جس پر عمل پیرا ہوکر ایک صالح انسانی معاشرے کی تشکیل ہوتی ہے۔ محسنِ کائنات صلی اللہ تعالیٰ علیہ وسلم کی حیاتِ طیبہ اور آپ کے اخلاقِ کریمہ ہمارے لیے قابلِ اتباع ہیں۔ آپ کا اخلاق اور بندگانِ خدا کے ساتھ آپ کے معاملات اتنے عمدہ اور اچھے تھے کہ دنیا کی تاریخ میں ایسی مثال نہیں ملتی۔ اللہ تعالیٰ قرآنِ مجید میں خود آپ کے عمدہ اخلاق کی تعریف یوں فرماتا ہے: وَاِنَّکَ لَعَلیٰ خُلُقٍ عَظِیْمٍ (القلم: ۶۸؍ ۴)اور اے محبوب( صلی اللہ علیہ وسلم)! آپ خلقِ عظیم پر فائز ہیں۔ غور کرنے کا مقام ہے کہ جب ربِّ کائنات خود آپ کے اخلاق کی تعریف بیان فرمارہا ہے تو پھر آپ کے اخلاق کی بلندی کا کما حقہ اندازہ کیسے کیا جاسکتا ہے۔ عرب جیسے بدو، جاہل اور ضدی قوم کو اسلام کا حامی بنانا ایک مشکل کام تھا لیکن آپ کو اللہ تعالیٰ نے دیگر تمام خوبیوں اور کمالات کے ساتھ اخلاقِ حسنہ کی ایسی تلوار عنایت فرمائی تھی جس سے ان کے کفر وطغیان کا دیو خود بخود مات کھا گیا اور ایک قلیل مدت میں عرب کے چپے چپے پر اسلامی عظمت کا پرچم لہرانے لگا۔ حضور اکرم صلی اللہ علیہ وسلم نے اعلانِ نبوت سے قبل اپنی چالیس سالہ حیات ِمبارکہ میں عربوں کے سامنے اپنا ایسا اخلاق اور کردار پیش فرمایا کہ مخالفین بھی آپ کو صادق وامین کے لقب سے پکارنے لگے۔ حضرت پیغمبرِ اسلام صلی اللہ تعالیٰ علیہ وسلم بے حد خلیق تھے، کسی سے ترش روئی کے ساتھ پیش نہیں آتے، کسی کو ڈانٹتے نہیںتھے، بچوں، بوڑھوں، مجبوروں اور یتیموں ہر ایک کے ساتھ شفقت ومحبت سے پیش آتے چنانچہ سب سے پہلی ہجرت اسلام میں حبشہ کی طرف ہوئی جس میں مہاجرین کی تعداد کل پندرہ تھی۔ گیارہ مرد اور چار عورتیں۔ مسلمانوں کا یہ قافلہ شاہِ حبشہ نجاشی کے ملک میں امن وسلامتی کی زندگی بسر کرنے لگا لیکن قریش نے اپنے آدمی بھیج کر بادشاہ سے ان کے بارے میں شکایت کی تو بادشاہ نے تحقیق حال کے لیے مسلمانوں کو طلب کیا مہاجرین کی جانب سے حضرت جعفر بن ابی طالب نے بادشاہ کے سامنے جو تقریر کی وہ آپ کے اخلاق ومحاسن کا بین ثبوت ہے۔ حضرت جعفر ابن ابی طالب نے اس طرح تقریر کی۔ ’’اے بادشاہ! ہم لوگ ایک جاہل قوم تھے، بتوں کی پوجا کرتے تھے، مردار کھاتے تھے ،بدکاریاں کرتے تھے، ہمسایوں کو ستاتے تھے، بھائی بھائی پر ظلم کرتا تھا، قوی لوگ کمزوروں کو کھاجاتے تھے۔ اس اثنا میں ہم میں سے ایک شخص پیدا ہوا جس کی شرافت اور صدق ودیانت سے ہم لوگ پہلے سے واقف تھے۔ اس نے ہم کو اسلام کی دعوت دی اور یہ سکھایا کہ ہم پتھروں کو پوجناچھوڑدیں، سچ بولیں، خوں ریزی سے باز آئیں، یتیموں کا مال نہ کھائیں، ہمسایوں کو آرام دیں، پاک دامن عورتوں پر بدنامی کا داغ نہ لگائیں، نماز پڑھیں ، روزے رکھیں، زکوٰۃ دیں۔ ہم اس پر ایمان لائے، شرک اور بت پرستی چھوڑ دی اور تمام اعمال بد سے باز آئے۔تو اس جرم پر ہماری قوم ہماری جان کی دشمن ہوگئی اور ہم کو مجبور کرتی ہے کہ اسی گمراہی میں واپس آجائیں۔‘‘(سیرت ابن ہشام ج۱، ص۳۶۳، مطبوعہ دار الکتا ب العربی بیروت) حضرت جعفر ابن ابی طالب کی شاہِ حبشہ نجاشی کے دربار میں بیان کردہ یہ تقریرا س بات کاواضح ثبوت ہے کہ سرکارِ کائنات صلی اللہ تعالیٰ علیہ وسلم نے اہل عرب کو اخلاق ومحاسن کا درس عظیم دیا اور اسی کے اثر سے دعوت دین کا حلقہ وسیع سے وسیع تر ہوتا گیا۔ بخاری شریف کی ایک حدیث میں ہے۔ ایک دفعہ ایک شخص نے خدمتِ اقدس میں باریابی کی اجا ز ت چاہی توآپ نے فرمایا: اچھا آنے دو وہ اپنے قبیلے کا اچھا آدمی نہیں ہے لیکن جب وہ خدمتِ مبارک میں حاضر ہوا تو نہایت نرمی کے ساتھ اس سے گفتگو فرمائی۔ حضرت عائشہ کو اس پر تعجب ہوا اور آپ سے دریافت کیا کہ آپ تو اس کو اچھا نہیں سمجھتے تھے پھربھی اس کے ساتھ رِفق وملاطفت کے ساتھ کلام کیا۔ آپ نے فرمایا: خدا کے نزدیک سب سے برا وہ شخص ہے جس کی بدزبانی کی وجہ سے لوگ اس سے ملنا جلنا چھوڑ دیں۔ (بخاری، ج؍۲، ص؍۹۰۵، کتاب الادب، باب المداراۃ مع الناس) رسولِ اکرم صلی اللہ تعالیٰ علیہ وسلم کی ذات سراپا رحمت اور پیکرِ الفت ومحبت تھی۔ نرم کلامی، حلم وبردباری، اعتدال ومیانہ روی، صدق ودیانت داری، شجاعت وبہادری، سخاوت ودریادلی، عدل و انصاف، عفو ودرگزر وغیرہ یہ سب وہ صفات ہیں جو سرور کائنات صلی اللہ تعالیٰ علیہ وسلم کی ذات میں بدرجہ اتم موجود تھیں۔ حضورِ اکرم صلی اللہ تعالیٰ علیہ وسلم کو خداوند قدوس نے سارے جہان کے لیے آئیڈیل اور رہنما بنا کر مبعوث فرمایا ہے اور کوئی بھی آئیڈیل اور قابلِ اتباع اس وقت ہوسکتا ہے جب کہ اس کے اندر وہ تمام صفات موجود ہوں جو اسے دیگر تمام انسانوں سے ممتاز اور نما یا ں کردیں اوران تمام چیزوں سے اس کی ذات پاک وصاف ہو جو اخلاقِ رزیلہ یا صفاتِ مذمومہ کے تحت آتے ہیں۔ نبیِ کریم صلی اللہ تعالیٰ علیہ وسلم کی سیرت ہمارے لیے دستور العمل ہے۔ فرمان خداوندی ہے لَقَدْ کَانَ لَکُم فِیْ رَسُوْلِ اللّٰہِ اُسْوَۃٌ حَسَنَۃٌ (الاحزاب: ۳۳؍۲۱) رسولِ اکرم صلی اللہ علیہ وسلم کی زندگی تمہارے لیے بہترین نمونۂ عمل ہے۔ اس لیے ہمیں چاہیے کہ سرورِ کائنات صلی اللہ تعالیٰ علیہ وسلم کی زندگی کو اپنے لیے عملی نمونہ بنا ئیں اور بالخصوص آپ کے اخلاقِ کریمہ اور صفاتِ حسنہ سے درس لیں اس لیے کہ دونوں جہاں کی کامیابی اسی میں مضمر ہے۔ رسول اللہ صلی اللہ علیہ وسلم نے تعلیمِ امت کے لیے ارشاد فرمایا۔ عن انس بن مالک ان رسول اللہ صلی اللہ علیہ وسلم قال : لاتباغضوا ولاتحاسدوا ولا تدابروا وکونوا عباد اللہ اخوانا ولا یحل لمسلم ان یہجر اخاہ فوق ثلاث لیال (بخاری، ج۲ ص،۸۹۷، حدیث ۸۵۴، کتاب الادب) حضرت انس بن مالک رضی اللہ عنہ سے روایت ہے کہ نبیِ اکرم صلی اللہ تعالیٰ علیہ وسلم نے ارشاد فرمایاکہ ایک دوسرے پر بغض وحسد نہ کرو، ایک دوسرے سے منہ نہ پھیرو اور اے خدا کے بندو! آپس میں بھائی بھائی بن کر رہو اور کسی مسلمان کے لیے جائز نہیں ہے کہ اپنے بھائی کو تین دن سے زیادہ چھوڑے رہے۔ ایک اور حدیث ہے۔ عن ابن عمران رسول اللہ صلی اللہ تعالیٰ علیہ وسلم قال: المسلم اخوالمسلم لایظلمہ ولا یسلمہ ومن کان فی حاجۃ اخیہ کان اللہ فی حاجتہ ومن فرج عن مسلم کربۃ فرج اللہ عنہ کربۃ من کربات یوم القیٰمۃ ومن ستر مسلماً سترہ اللہ یوم القیٰمۃ (مشکوٰۃ ،ص؍۴۲۲، باب الشفقۃ والرحمۃ) حضرت ابن عمر رضی اللہ عنہما سے مروی ہے کہ رسول اللہ صلی اللہ تعالیٰ علیہ وسلم نے فرمایا کہ مسلمان مسلمان کا بھائی ہے نہ اس پر ظلم کرے اور نہ اس کی مدد چھوڑے۔ جو شخص اپنے بھائی کی حاجت میں ہوتو اللہ تعالیٰ اس کی حاجت میں ہے اور جو شخص مسلمان سے کسی تکلیف کو دور کرے اللہ تعالیٰ قیامت کی تکلیف میں سے ایک تکلیف اس سے دور کردے گا اور جو شخص کسی مسلمان کی پردہ پوشی کرے گا اللہ تعالیٰ قیامت کے دن اس کی پردہ پوشی کرے گا۔ مشکوٰۃ شریف کی ایک دوسری حدیث ہے۔ عن انس قال: قال رسول اللہ صلی اللہ علیہ وسلم والذی نفسی بیدہ لایؤمن عبد حتی یحب لاخیہ مایحب لنفسہ۔ (مشکوٰہ: ص؍۴۲۲، باب الشفقۃ) حضرت انس رضی اللہ عنہ سے روایت ہے کہ رسولِ عربی صلی اللہ تعالیٰ علیہ وسلم نے ارشاد فرمایا: قسم ہے اس کی جس کے قبضۂ قدرت میں میری جان ہے بندہ مومن نہیں ہوتا جب تک اپنے بھائی کے لیے وہ پسند نہ کرے جو اپنے لیے پسند کرتا ہے۔ درج بالا احادیث سے یہ ثابت ہوتا ہے کہ بغض، حسد، کبر وریا کاری، نفرت وعداوت، مسلمانوں کی عیب جوئی وبے عزتی، ترکِ امداد،اہلِ حاجت کی حاجت روائی سے انحراف، ظلم وزیادتی اور دو سر و ں کے خسارہ ونقصان کی تمنا وخواہش ۔یہ سب ایسے اعمال ہیں جو شریعت کی نظر میں معتوب ومبغوض ہیں اور انہیں رزائلِ اخلاق کی فہرست میں شمار کیا جاتا ہے اُمتِ مسلمہ کو ان اعمالِ خبیثہ سے اجتناب ضروری ہے۔ خاص طور پر سب سے اخیر والی حدیث اپنے مفہوم ومعنی کے اعتبار سے بے حد جامع ہے۔ اس حدیث میں وہ تمام چیزیں آگئیں جنہیں ایک انسان اپنے لیے پسند کرتا ہے یا اپنے لیے ناپسند کرتا ہے اورظاہر سی بات ہے کہ ہر انسان اپنے لیے وہی پسند کرتا ہے جو اس کے حق میں منفعت بخش ہو اور ہر اس چیز کو ناپسند کرتا ہے جو اس کے لیے مضرت رساں ونقصان دہ ہو۔ ایک انسان اپنے لیے جن باتوں کو پسند کرتا ہے ان میں یہ ہے کہ رنج والم کے ہجوم میں اس کا کوئی غم خوار وخیر خواہ ہو، اگر کسی کے ہاتھوں ظلم وستم اور جبر وتشددکا شکار ہے تو دوسرا اس کی امداد واعانت کرے اور ظالم کے ظلم سے نجات دلائے، اگر وہ بیمار ہے تو کوئی اس کا پرسان حال ہو، اگر قرض ودین کے بوجھ تلے دبا ہے تو کوئی اس کی امداد واعانت کرکے بار قرض سے نجات دلائے ،اگر بھوکا ہے تو اس کی خواہش ہوتی ہے کہ کوئی اسے کھانا کھلائے، اگر یتیم ہے تو سوچتا ہے کہ کوئی اس کے سر پر دستِ شفقت پھیرے اور اگر مجبور ولاچار ہے تو اس کی تمنا ہوتی ہے کہ کوئی اس کی مجبوری ولاچاری دور کرے۔ کوئی اس سے حسد نہ کرے، کوئی اس کی برائی وملامت نہ کرے، کوئی اس کا بدخواہ نہ ہو، کوئی اس کی غیبت نہ کرے، کوئی اس کی چغلی نہ کھائے، نہ ستائے، نہ مارے پیٹے اورنہ کسی قسم کا کوئی ایسا کام انجام دے جس سے اس کو تکلیف پہنچتی ہے۔ اسی طرح سے اس شخص کو بھی غور کرنا چاہیے کہ جب میں ان تمام باتوں کو خود اپنے لیے پسند نہیں کرتا تو اپنے مسلم بھائی کے لیے کیوں کر پسند کروں۔ حضور اکرم صلی اللہ تعالیٰ علیہ وسلم نے ارشاد فرمایا کہ مسلمان وہ ہے جس کے ہاتھ اور زبان سے لوگ محفوظ رہیں۔ (مشکوٰۃ: کتاب الایمان، حدیث نمبر؍ ۲) نبیِ اکرم صلی اللہ تعالیٰ علیہ وسلم نے اپنے افعال، اقوال، کردار اور سیرتِ طیبہ سے ہمیں حسنِ معاشرت کا ایسا حسین نمونہ عطا فرمادیا ہے جس کی روشنی میں ہم اپنے تاریک دلوں کی کدورت مٹا سکتے ہیں اور ایک ایسے خاندان ومعاشرے اور ماحول وسوسائٹی کی تشکیل میں کامیاب ہوسکتے ہیں جس کا ہر فرد بشر اسلام کا سچا مبلغ، پابندِ شریعت، متبعِ سنت اور ہر اخلاقی وباطنی امراض سے محفوظ ومامون ہوگا۔ شریعت کے احکام اور احادیثِ رسول صلی اللہ تعالیٰ علیہ وسلم کی روشنی میں جب ہم اپنے معاشرے پر نگاہ ڈالتے ہیں تو اندازہ ہوتا ہے کہ ہمارا معاشرہ بے پناہ برائیوں کی آماجگاہ بن چکا ہے، گھر، خاندان، قصبہ، دیہات یا پھر کوئی تنظیم وتحریک اور مدارس ومکاتب الغرض جہاں کہیں بھی چند افراد ایک ساتھ زندگی کے روز وشب گزار تے ہیں ان کے مابین نا اتفاقی، بغض وحسد، ایک دوسرے کے متعلق شکوہ شکایت اور غیبت و چغل خوری کی وبا عام ہے۔ ایک تنظیم دوسری تنظیم وتحریک کے افراد کی خامیاں نکالنے اور اس کو نیچا دکھانے میں اپنا پورا زور صرف کردیتی ہے، ہر وقت اسے یہی فکر رہتی ہے کہ اس کے اندر کون سی ایسی خامی تلاش کی جائے جس سے اس کی امیج گھٹ جائے اور معاشرے میں لوگ اسے گری ہوئی نظروں سے دیکھنے لگیں۔ اسی طرح سے ایک خانقاہ کے پیرو سجادہ نشین دوسری خانقاہ کے لوگوں کو ہر طرح سے متہم کرنے اور لوگوں کے سامنے ان کی برائیاں کرکے اپنے مریدین و متوسلین کی تعداد میں اضافہ کرنے کے خواہاں رہتے ہیں۔ا س کی بہت سی مثالیں ہمارے اردگردبکھری پڑی ہیں۔ یہ احوال اجتماعی زندگی کے ہیں انفرادی زندگی میں بھی آج کا انسان بے حد خود غرض، مفادپرست اور انا پرست ہوچکا ہے اپنے آگے وہ کسی کو خاطر میں نہیں لاتا۔ حضور نے ارشاد فرمایا: اُفْشُو ْالسَّلَاَمَ یعنی سلام کو پھیلاؤ مطلب یہ کہ اسے زیادہ سے زیادہ رواج دو مگر آج ہر کوئی یہی سوچتا ہے کہ سامنے والا شخص پہلے مجھے سلام کرے۔ راستے میں کوئی گرفتارِ بلا مل جاتا ہے یا مصیبت کے مارے سے اچانک اتفاق پڑجاتا ہے تو اس کی پریشانی ومصیبت سن کر ذرہ برابر بھی ہمارے دل میں نرمی وہمدردی نہیں پیدا ہوتی ہے الاماشاء اللہ۔ غرضیکہ ہمارے اندر بے پناہ خامیاں سرایت کرچکی ہیں جس کا اصل سبب یہی ہے کہ ہم نے اُسوۂ رسول صلی اللہ تعالیٰ علیہ وسلم پر عمل کرنا چھوڑ دیا ہے اور آپ کی اخلاقی تعلیمات وارشادات سے منحرف ہوگئے ہیں۔ ہمارے حضورِ اکرم صلی اللہ تعالیٰ علیہ وسلم نہایت رحم دل اور رقیق القلب تھے ۔جب کسی کو رنج ومصیبت میں مبتلا دیکھتے خواہ موافق ہو یا مخالف خود رنجیدہ خاطر ہوجاتے گویا وہ تکلیف آپ ہی کو پہنچی ہو۔ حضرت مصعب بن عمیر ایک صحابی تھے جو اسلام سے پہلے ناز ونعمت میں پلے تھے ان کے والدین بیش قیمت لباس ان کو پہناتے تھے خدا نے ان کو اسلام کی توفیق عطا فرمائی اور وہ مسلمان ہوگئے۔ یہ دیکھ کر کہ لڑکے نے اپنے آبائی مذہب کو ترک کردیا ہے توان کے والدین کی محبت دفعتاً عداوت میں بدل گئی ۔ایک روز وہ حضور صلی اللہ تعالیٰ علیہ وسلم کی خدمتِ مبارک میں اس حال میں آئے کہ وہ جسم جو حریر وقاقُم میں ملبوس رہتا تھا اس پر پیوند سے ایک کپڑا بھی سالم نہ تھا۔ یہ منظر دیکھ کرحضور صلی اللہ تعالیٰ علیہ وسلم آبدیدہ ہوگئے۔ (ترغیب وترہیب، ج؍۲، ص؍۲۴۷) ایک بار ایک صحابی جاہلیت کا اپنا قصہ بیان کررہے تھے کہ میری ایک چھوٹی لڑکی تھی عرب میں لڑکیوں کو مار ڈالنے کا رواج تھا میں نے بھی اپنی لڑکی کو زندہ زمین میں گاڑ دیا ۔وہ ابا! ابا! کہہ کر پکار رہی تھی اور میں اس پر مٹی کے ڈھیلے ڈال رہا تھا۔ اس بے دردی کو سن کر حضور صلی اللہ تعالیٰ علیہ وسلم کی آنکھوں سے بے اختیار آنسو جاری ہوگئے آپ نے فرمایا ’’اس قصہ کو پھر دہراؤ‘‘ ان صحابی نے اس دردناک ماجرے کو دوبارہ بیان کیاتو آپ بے اختیار روئے یہاں تک کہ روتے روتے ریش مبارک تر ہوگئی۔ (سنن دارمی:باب ماکان علیہ الناس قبل مبعث النبی ، ص؍۱۳) ان دونوں حدیثوں سے معلوم ہوتا ہے کہ سرکارِ کائنات صلی اللہ علیہ وسلم انسانی ہمدردی ، محبت ورواداری کے اعلیٰ مقام پر فائز تھے اور پھر آپ کے اخلاق کے نتیجے میں جو اثرات مرتب ہوئے وہ دنیا نے دیکھ لیا کہ تیئس سالہ مختصر مدت میں حامیانِ اسلام کی ایک فوج تیار ہوگئی اور لوگ جوق در جوق دائرہ اسلام میں داخل ہونے لگے۔ آج جب کہ بے راہ روی، اخلاقی انحطاط وپستی اور خود غرضی وانا پرستی کا دور دورہ ہے ایسے ماحول میں ہم مسلمانوں کی ذمے داری ہوتی ہے کہ ہم قرآن وسنت کی رسی کو مضبوطی سے تھام کر عمدہ اخلاق وکردار کا مظاہرہ کریں جس سے دیگر قومیں یہ کہنے پر مجبور ہوجائیں کہ واقعی اسلام امن وامان، محبت ورواداری اور خیر خواہی وبھائی چارگی کا مذہب ہے اورہم ڈاکٹر اقبال کے اس شعر کے مصداق بن جائیں ۔؎ ہر لحظہ ہے مومن کی نئی شان نئی آن کردار میں گفتار میں اللہ کی برہان