سیدنا آدم علیہ السلام

آپ کو اللہ تعالیٰ نے تمام چیزوں کے نام کا علم دیا، آپ کو فرشتوں نے سجدہ کیا۔
حضور سرور عالم صلی اللہ علیہ وسلم

سیدنا ومولانا محمد مصطفی احمد مجتبیٰ صلی اللہ علیہ وسلم کو اللہ تعالیٰ نے اسما کے علاوہ مُسمَّیات کا بھی علم دیا جیسا کہ حدیث طبرانی ومسندِ فردوس میں مذکور ہے۔ آپ پر اللہ تعالیٰ اور اس کے فرشتے درود بھیجتے رہتے ہیں اور مومنین بھی سلام ودرود بھیجتے ہیں یہ شرف اتم واکمل ہے کیوں کہ سجدہ تو ایک دفعہ ہوکر منقطع ہوگیا اور درود وسلام ہمیشہ کے لیے جاری ہے اور اتم بھی ہے کیوں کہ سجدہ تو صرف فرشتوں سے ظہور میں آیا اور درود میں اللہ تعالیٰ اور فرشتے اور مومنین شامل ہیں علاوہ ازیں امام فخر الدین رازی رحمۃ اللہ علیہ تفسیر کبیر میں لکھتے ہیں کہ اللہ تعالیٰ نے فرشتوں کو اس لیے سجدہ کا حکم دیاتھا کہ نورِ محمدی حضرت آدم علیہ السلام کی پیشانی میں تھا۔
سیدنا ادریس علیہ السلام

حضرت ادریس علیہ السلام کو اللہ تعالیٰ نے آسمان پر اٹھایا۔
ہمارے نبی پاک صلی اللہ علیہ وسلم کو اللہ تعالیٰ نے شب معراج میں آسمانوں کے اوپر مقام قاب قوسین تک اٹھایا۔
سیدنا نوح علیہ السلام

اللہ تعالیٰ نے آپ کو اور آپ پر ایمان لانے والوں کو غرق ہونے سے نجات دی۔
حضور سرور عالم صلی اللہ علیہ وسلم

آپ کے وجود کی برکت سے آپ کی اُمت عذابِ استیصال سے محفوظ رہی۔
وَمَا کَانَ اللّٰہُ لِیُعَذِبَّہُمْ وَاَنْتَ فِیْہِمْ۔ اور اللہ کا کام نہیں کہ انہیں عذاب کرے جب تک اے محبوب تم ان میں تشریف فرما ہو۔ (پارہ ۹سورۃ الانفال، آیت ۳۳)
یعنی اللہ تعالیٰ ان کو عذاب نہیں دے گا اس حال میں کہ آپ ان میں موجود ہیں۔
٭ اللہ تعالیٰ نے کشتیِ نوح کو بھی آپ ہی کے نور کی برکت سے غرق ہونے سے بچایا کیوں کہ اس وقت نور محمدی حضرت سام علیہ السلام کی پیشانی میں تھا۔ (زرقانی علی المواہب، ص۵۴، ج۳)
سیدنا ہود علیہ السلام

آپ کی مدد کے لیے اللہ تعالیٰ نے ہوا بھیجی۔
حضور نبی پاک صلی اللہ تعالیٰ علیہ وسلم
آپ نے فرمایا کہ بادِ صبا سے میری مدد کی گئی اور قوم عاد مغربی ہوا سے ہلاک کی گئی۔ (خصائص کبریٰ، صحیحین، ص: ۳۳۸)
سیدنا صالح علیہ السلام

آپ کے لیے اللہ تعالیٰ نے پتھر میں سے اونٹنی نکالی۔
٭ آپ فصاحب میں یگانۂ روزگار تھے۔
جامع کمالات حضرت محمد مصطفی صلی اللہ تعالیٰ علیہ وسلم

اونٹ نے آپ کی اطاعت کی اور آپ سے کلام کیا۔
فصاحت میں کوئی آپ کے درجہ کو نہیں پہنچا۔
سیدنا ابراہیم علیہ السلام

اللہ تعالیٰ نے آپ کے لیے آگ ٹھنڈی کردی۔
آپ کو مقام خُلّت عطا ہوا اسی واسطے آپ کو خلیل اللہ کہتے ہیں۔
آپ نے اپنی قوم کے بت خانے کے بت توڑے۔
آپ نے خانۂ کعبہ کی تعمیر فرمائی۔
حضور سرور عالم صلی اللہ علیہ وسلم

آپ ہی کے نور کی برکت سے حضرت ابراہیم خلیل اللہ پر آگ ٹھنڈی ہوگئی۔آپ کی ولادت شریف پر فارس کی آگ جو ہزار (۱۰۰۰) برس سے نہ بجھی تھی گل ہوگئی۔ شب معراج میں کرۂ نار سے آپ کا گزر ہوا اور کوئی تکلیف نہ پہنچی۔ آپ کی اُمت میں بھی ایسے بزرگ گزرے ہیں کہ آگ میں ڈالے گئے اور سلامت رہے۔ چناں چہ ابو مسلم خولانی وذویب بن کلیب وغیرہ۔ (ورد نارا الخلیل مکتتما فی صلبہ انت کیف یحترق)۔ حضرت ابراہیم خلیل اللہ آگ میں پوشیدہ داخل ہوئے آپ ان کی پشت میں تھے کیسے جل سکتے تھے، طبرانی وغیرہ نے اس قصہ کو روایت کیا ہے۔ مواہب زرقانی، خصائص کبریٰ، ص۷۹، ج۱۔ زرقانی علی المواہب، ص: ۱۹۳، ج۵۔ (تفصیل فقیر کے رسالہ ’’مصدر السرور‘‘ میں ہے)
آپ کو درجۂ خلت عطا ہوا اور اس سے بڑھ کر درجہ حبیب اللہ کا ہے۔
آپ نے خانۂ کعبہ کے گرد اوپر جو تین سو ساٹھ (۳۶۰) بت نصب تھے محض ایک لکڑی کے اشارے سے یکے بعد دیگرے گرا دئیے ۔
آپ صلی اللہ علیہ وسلم نے خانۂ کعبہ کی تعمیر فرمائی اور حجرِ اسود کو اس جگہ پر رکھ دیا تاکہ آپ کی اُمت کے لوگ طواف وہاں سے شروع کریں۔
سیدنا اسماعیل علیہ السلام

جب آپ کو والد بزرگوار ذبح کرنے لگے تو آپ نے صبر کیا۔
حضور نبی پاک صلی اللہ علیہ وسلم

اس کی نظیر آں حضرت صلی اللہ علیہ وسلم کا شق صدر ہے جو وقوع میں آیا حالاں کہ ذبح اسماعیل وقوع میں نہ آیا بلکہ ان کی جگہ دنبہ ذبح کیاگیا۔
سیدنا یعقوب علیہ السلام

آپ کو جب برادرانِ یوسف نے خبر دی کہ یوسف کو بھیڑیا کھاگیاہے توآپ علیہ السلام نے بھیڑئیے کو بلا کر پوچھاتو بھیڑیا بولا میں نے یوسف کو نہیں کھایا۔( روح البیان، پ۱۲، خصائص کبریٰ، ص: ۱۸۲، ج۲)
حضرت یعقوب علیہ السلام فراقِ یوسف میں مبتلا ہوئے اور صبر کیا یہاں تک کہ غم کے مارے آپ کی آنکھیں سفید ہوگئیں اورقریب تھا کہ مضمحل یا ہلاک ہوجاتے۔
جامع کمالات حضرت محمد مصطفی صلی اللہ علیہ وسلم

آپ سے بھی بھیڑئیے نے کلام کیا۔ آپ اپنے صاحبزادے حضرت ابراہیم علیہ السلام کی دائمی مفارقت میں مبتلا ہوئے مگر آپ نے صبر کیا حالاں کہ اس وقت اور کوئی صاحبزادہ آپ کا نہ تھا۔
حضرت یوسف علیہ السلام

آپ کو اللہ تعالیٰ نے بڑا حسن وجمال عطا فرمایا۔ آپ خوابوں کی تعبیر کرتے تھے مگر قرآن مجید میں صرف تین خوابوں کی تعبیر وارد ہے۔ آپ اپنے والدین اور وطن کے فراق میں مبتلا ہوئے۔
حضور نبی پاک صلی اللہ تعالیٰ علیہ وسلم

آپ کو ایسا حسن عطا ہوا کہ کسی کو نہیں ہوا، حضرت یوسف علیہ السلام کو تو نصف حسن ملا تھا مگر آپ کو تمام ملا۔
آپ سے تعبیرِ رُویا کی کثیر مثالیں احادیث میں مذکور ہیں۔ آپ نے اہل اور رشتہ داروں اور دوستوں اور وطن کو چھوڑ کر ہجرت کی۔
سیدنا ایوب علیہ السلام

آپ صابر تھے۔
حضور نبی پاک صلی اللہ تعالیٰ علیہ وسلم

صبر میں آپ کے احوال حصر (شمار)سے خارج ہیں۔
سیدنا موسیٰ علیہ السلام

حضرت موسیٰ علیہ السلام کو ید ِبیضا عطا ہوا۔ آپ نے عصار مار کر پتھر سے پانی جاری کردیا۔ آپ کو عصاعطاہوا جو اژدہا بن جاتا تھا۔ آپ نے کوہ طور پر اپنے رب تعالیٰ سے کلام فرمایا۔ آپ نے عصاسے بحیرۂ قُلزم کو دوپارہ کردیا۔
حضور نبی پاک صلی اللہ تعالیٰ علیہ وسلم

آپ کی پشت مبارک پر مہرِ نبوت تھی علاوہ ازیں آپ سراپا نور تھے اگر آپ نے نقابِ بشریت نہ اوڑھا ہوتا تو کوئی جمال کی تاب نہ لاتا۔ آپ نے انگلیوں سے چشموں کی طرح پانی جاری فرمایا اور یہ اس سے بڑھ کر ہے کیوں کہ پتھر سے پانی نکلنا متعارف ہے مگر خون وگوشت میں متعارف نہیں۔ ستونِ حنّانہ جو کھجور کا ایک خشک تنا تھا آپ کے فراق میں رویا اور اس سے بچے کی سی آواز نکلی جو ماں کے فراق میں رو رہا ہو۔ آپ نے عرش پر مقام قاب قو سین میں اپنے رب تعالیٰ سے کلام کیااور دیدارِ الٰہی سے بھی بہرہ ور ہوئے اورحالتِ تمکین میں رہے۔ آپ نے انگشت شہادت سے چاند کو دو ٹکڑے کردیا۔ معجزہ کلیم تو زمین پر تھا اور یہ آسمان پر، وہاں عصا کا سہارا تھا اور یہاں صرف انگلی کا اشارہ تھا۔
حضرت یوشع علیہ السلام

آپ کے لیے آفتاب ٹھہرایا گیا۔ آپ نے حضرت موسیٰ علیہ السلام کے بعد جبارین سے بات کی۔
حضور نبی پاک صلی اللہ تعالیٰ علیہ وسلم
آپ کے لیے بھی آفتاب غروب ہونے سے روکا گیا۔ آپ نے بدر کے دن جبارین سے جہاد کیااور ان پر فتح پائی، آپ وفات شریف تک جہاد کرتے رہے اور جہاد قیامت تک آپ کی امت میں جاری رہے گا۔
حضرت داؤد علیہ السلام

آپ کے ساتھ پہاڑ تسبیح پڑھتے تھے۔ پرندے آپ کے لیے مسخر کردیے گئے۔ آپ کے ہاتھ میں لوہا موم کی طرح نرم ہوجاتا تھا۔ آپ نہایت خوش آواز تھے۔
حضور نبی پاک صلی اللہ تعالیٰ علیہ وسلم

آپ کے ہاتھ مبارک میں سنگ ریزوں نے تسبیح پڑھی بلکہ آپ نے دوسروں کے ہاتھ میں بھی کنکروں سے تسبیح پڑھوادی، اس سے بڑھ کر یہ ہے کہ آپ کے طعام میں تسبیح کی آواز آیا کرتی تھی کیوں کہ پہاڑ تو خشوع و خضوع سے متصف ہے مگر طعام سے تسبیح معہود نہیں۔ پرندوں کے علاوہ حیوانات اونٹ، بھیڑئیے، شیر وغیرہ آپ کے لیے مسخر اور مطیع کردیے گئے۔ آپ کے لیے شب معراج میں صخرۂ بیت المقدس خمیر کی مانند ہوگیاتھا پس آپ نے اس سے براق باندھا۔ (دلائل حافظ ابو نعیم اصفہانی)
آپ بھی نہایت خوش آواز تھے،چنانچہ ترمذی شریف میں حدیث انس رضی اللہ تعالیٰ عنہ میں نقل کیا ہے:
’’ وکان نبیکم احسنہم وجہًاواحسنہم صوتاً‘‘۔
سیدنا سلیمان علیہ السلام

آپ کو ملکِ عظیم عطا ہوا۔ آپ کے تخت کو جہاں آپ چاہتے ہوا اُڑا لے جاتی، صبح سے زوال تک ایک مہینہ کی مسافت اور زوال سے شام تک ایک مہینہ کی مسافت طے کرتے تھے۔ جن بقہر وغلبہ آپ کے مطیع تھے اور آپ پرندوں کی بولی سمجھتے تھے۔
حضور نبی پاک صلی اللہ تعالیٰ علیہ وسلم

آپ کو اللہ تعالیٰ نے اختیار دیا کہ نبوت کے ساتھ ملک لیں یا عبودیت، آپ نے عبودیت کوپسند فرمایا بایں ہمہ اللہ تعالیٰ نے خزائن الارض کی کنجیاں آپ کو عطا فرمائیں اور آپ کو اختیار دیا ہے۔ آپ کو شب معراج میں براق عطا ہواجو ہوا بلکہ بجلی سے بھی تیز رفتار تھا۔ جن بہ رضا ورغبت آپ پر ایمان لائے، آپ اونٹ، بھیڑئیے وغیرہ حیوانات کا کلام سمجھتے تھے، آپ سے پتھر نے کلام کیا جسے آپ نے سمجھ لیا۔
سیدنا عیسیٰ علیہ السلام

آپ مردوں کو زندہ اور اندھوں کو بینا، کوڑھیوں کو اچھا کردیتے تھے۔
آپ نے مٹی سے پرندہ بنایا۔ آپ نے گہوارے میں لوگوں سے کلام کیا، آپ بڑے زاہد تھے۔
حضرت محمد مصطفی صلی اللہ تعالیٰ علیہ وسلم

آپ نے مردوں کو زندہ اور اندھوں کو بینا اور کوڑھیوں کو اچھا کیا اور جب خیبر فتح ہواتو وہاں ایک یہودیہ عورت نے آپ کو زہر آلود بکری کا گوشت بطور ہدیہ بھیجا، آپ نے بکری کا بازو لیا اور اس میں سے کچھ کھایا، وہ بازو بولا کہ مجھ میں زہر ڈالاگیا ہے یہ مردے کو زندہ کرنے سے بڑھ کر ہے کیوں کہ یہ میت کے ایک جزو کا زندہ ہونا ہے حالاں کہ اس کا بقیہ جو اس سے منفصل تھا مردہ ہی تھا۔ غزوۂ بدر میں حضرت عکاشہ بن محصن کی تلوار ٹوٹ گئی آپ نے ان کو ایک خشک لکڑی دے دی جب انہوں نے اپنے ہاتھ میں لے کر ہلائی تو وہ سفید مضبوط لمبی تلوار بن گئی۔ آپ نے ولادت شریف کے بعد کلام کیا۔ آپ کازہد سب سے زیادہ تھا۔
نمونے کے طور پر چند انبیا ورسل علیہم الصلوٰۃ والسلام کے کمالات کے ساتھ حضور نبی کریم صلی اللہ تعالیٰ علیہ وسلم کے کمالات عرض کیے ہیں۔ تفصیل کے لیے فقیر کی تصنیف ’’تنہاداری‘‘ کا مطالعہ کیجیے۔ مولیٰ تعالیٰ قبول فرمائیے۔
{…}