(1)

“Qalam ki nok par rakhun ga is jahan ko main
Zameen lapet ke rakh doon ke aasman ko main”
(Mumtaz)

Jis qalam ki qasam saari kainaat banane wale Rab ne khayi ho,
us mein koi na koi baat zaroor hogi.
Tareekh ka sarsari jaiza lene par yeh baat wazeh ho jaati hai ke
duniya mein jo bhi inqilaab aaya,
woh yun hi nahi aaya — qalam ne laya.

Yeh qalam Qiyamat tak apna kaam karta rahega,
aur qalamkaar paida hote rahenge.

(2)

Hazrat Qatada farmate hain:
“Qalam Allah ki bohat badi nemat hai,
agar qalam na ho to deen qaim na rahe.”
(Tafseer Tabri, zair-e-aayat: Allazi ‘allama bil-qalam)

Yahi qalam tha jis ne Qur’an ko mehfooz kiya.
Yahi qalam tha jis ne Ahadees aur Seerat ko jama kiya.
Yahi qalam tha jis ne fiqhi masail likhe.
Yahi qalam tha jis ne tasawwuf ki baatein hum tak pohanchayin.

Hazrat Qatada ne bilkul sach kaha ke
qalam na ho to deen qaim na reh sake.

(3)

Humein maloom hai ke log kitaabon se door hote ja rahe hain.

• Teen teen ghantay,
• Paanch paanch ghantay,
• Saat saat ghantay

log mobile par films, dramas aur reels dekhte rehte hain,
magar koi kitaab agar bees pachees minute bhi parhni pad jaaye,
to itne bezaar ho jaate hain
ke usey phaink kar hi dum lete hain.

Aisi situation mein
hum qalamkaaron ki zimmedariyan aur bhi barh jaati hain.

Ab humein:

• usloob aasaan se aasaan,
• tehreer mukhtasir se mukhtasir,

aur itni jazib o purkashish banana hogi
ke qaari,
na chahte hue bhi parhne par majboor ho jaaye.

— Mehaimi ✍️