اللہ تبارک وتعالیٰ نے کلامِ مجید میںارشاد فرمایا ہے: وَقُلْ لِّلْمُؤمِنِیْنَ یَغُضُّوْا مِنْ اَبْصَارِہِمْ (۱)
اور مسلمان مردوں کو حکم دوکہ اپنی نگاہیں کچھ نیچی رکھیں۔
دوسری جگہ ارشادفرمایا:وَقُلْ لِّلْمُؤمِنٰتِ یَغْضُضْنَ مِنْ اَبْصَارِہِنَّ (۲)
اور مسلمان عورتوں کو حکم دو اپنی نگاہیں کچھ نیچی رکھیں۔
اسلام میں ایسا نہیں ہے کہ اس نے بنی نوع انسان کو صرف برائیوں سے بچنے کا حکم دیا ہو اور کوئی ایسی راہ نہ بتائی ہو جس سے برائیوں سے بچا جا سکے بلکہ اس نے برائی کی طرف لے جانے والے ہر راستے ہی کو بند کردیے ہیں۔اسی لیے معاشرے کو ہر طرح کی برائی سے محفوظ رکھنے، اپنے آپ کو باعزت اور پروقار رکھنے اور اپنے دامن کو ہر طرح کی آلودگی سے بچانے کا جو طریقہ قرآنِ عظیم نے بتایا ہے اس میں سب سے پہلے نظروں کی حفاظت کرنے اور پردہ کرنے پر زور دیا ہے۔
آخر مردوزن دونوں کو نگاہیں نیچی رکھنے کا حکم کیوں دیاگیا؟ اس امر پر بحث کرتے ہوئے علامہ پیر کرم شاہ ازہری رحمۃ اللہ علیہ اپنی تصنیف ضیاء القرآن میں فرماتے ہیں:
’’اس (دامنِ عظمت کو ہر آلودگی سے پاک وصاف رکھنے)کا طریقہ قرآنِ مجید میں یہ بتایا ہے کہ مومن مرد اور مومنہ عورت اپنی نگاہیں نیچی رکھیں اور یہ حقیقت ہے کہ آنکھوں میں جب تک شرم وحیا ہوتی ہے انسان کے دل کی دنیا فاسد خیالات اور ناپاک نظریات کی یورش سے محفوظ رہتی ہے جذبات میں سکون واعتدال پایا جاتا ہے اور کسی کی آبرو کی طرف ہاتھ بڑھانا تو کجا آنکھ اٹھانے کی سکت بھی پیدا نہیں ہوتی لیکن جب آنکھیں نورِ حیا سے محروم ہوجاتی ہیں جب شرم کا پردہ چاک ہوجاتا ہے تو پھر پر سکون جذبات میں ایک آگ سی لگ جاتی ہے خبیث خیالات کا ایک سیلاب امڈ کر آجاتا ہے جو بڑے بڑے انسانوں کو تنکوں کی طرح بہا لے جاتا ہے حتیٰ کہ انہیں اپنے ظاہری تقدس کی پروا بھی نہیں رہتی‘‘۔ (۳)
نظروں کی حفاظت نہ کرنے والا شخص جب بے حیا ہوجاتا ہے اور دوسروں کی بہو بیٹیوں کو اپنے تیرِ ہوس کا نشانہ بنانے لگتا ہے تو اس کی اس بے حیائی کا نتیجہ ذکر کرتے ہوئے علامہ تحریر فرماتے ہیں:
’’بے حیا شخص صرف دوسروں کو ہی اپنے تیرِ ہوس کا نشانہ نہیں بناتا بلکہ وہ اپنے گھر کی فصیل میں خود شگاف ڈال کر لوگوں کو دعوت دیتا ہے کہ وہ بھی آکر اس کی آبرو کو خاک میں ملائیں‘‘۔ (۴)
اس بحث سے اتنا تو ضرور معلوم ہوا کہ انسان کی بے حیائی کی ابتدا نظروں کو غیر محارم کی طرف اٹھانے سے ہوتی ہے۔ اگر ابتدا ہی میں اس دروازے کو بند کردیا جائے تو انسان کی حیا محفوظ ومامون رہ سکتی ہے لیکن اگر اس بات کی اجازت دے دی جائے کہ دیکھنا جائز ہے اور پھر آگے جو گناہ اس راستے میں ہونے والے ہیں ان سے روکا جائے تو یقینا یہ ایک قسم کا ظلم ہوگا اور بہت بڑی زیادتی ہوگی کہ پہلے تو اس راستے پر چلنے کے لیے دروازہ کھول دیاگیا اور جب اس راستے پر چل پڑے تو اب روکا جارہا ہے اور اس پر سزا دی جارہی ہے اس لیے قرآنِ عظیم نے اولاً ہی مردو زن دونوں کے لیے یہ لازم کردیا کہ اپنی اپنی نگاہیں نیچی رکھو تاکہ گناہ کی ابتدا ہی نہ ہوسکے۔غیر محرم سے ربط وتعلق، اس سے سلام وکلام، ملنا جلنا اس کے بعد ہے۔ بے حیائی کی حدود کو پار کرنا یہاں تک کہ حدود کو پار کرکے زنا تک کی نوبت آجانا نگاہوں کے چار ہونے ہی سے ہوتا ہے۔
نگاہوں کے نیچا رکھنے پر اسلام نے کتنا زور دیا ہے آئیے اس کو ملاحظہ کرتے چلیں۔
عن ابی امامۃ یقول سمعت رسول اللہ صلی اللہ تعالیٰ علیہ وسلم اکفلوا لی بستٍ اکفل لکم بالجنۃ اذا حدث فلا یکذب واذا اؤتمن فلا یخن واذا وعد فلا یخلف وغضوا ابصارکم وکفوا ایدیکم واحفظوا فروجکم (۵)
اگر تم میرے ساتھ ان چھ باتوں کا وعدہ کرو تو میں تمہارے لیے جنت کا ضامن ہوں(۱) جب تم سے کوئی بات کرے تو جھوٹ نہ بولو(۲) جب تمہیں امین بنایا جائے تو خیانت نہ کرو(۳) جب وعدہ کرو تو وعدہ خلافی نہ کرو(۴) اپنی نگاہوں کو نیچے رکھو(۵) اپنے ہاتھوں کو روکے رکھو(۶) اپنی شرم گاہوں کی حفاظت کرو۔
ان چھ باتوں میں اخیر کی تین باتیں ایسی ہیں کہ جن کا راستہ بالکل ایک ہے کیوںکہ نگاہ حرکت کرتی ہے تو پھر ہاتھ میں حرکت پیدا ہوجاتی ہے جب یہ دونوں حرکت میں آجاتے ہیں تو ان دونوں کی حرکت کا نتیجہ بد اطواری کی شکل میں نکلتا ہے اس لیے حضور صلی اللہ تعالیٰ علیہ وسلم نے ان چیزوں کی حفاظت کا حکم فرمایا اور یہی نہیں بلکہ ان کے محافظین کو جنت کی ضمانت دے دی۔ اب اگر ہم نمبر (۴) سے لے کر نمبر (۶) تک کی ترتیب پر غور کریں تو معلوم ہوتا ہے کہ اخیر کی دونوں باتیں اس وقت وجود میں آئیں گی جب پہلی بات (نظر) ہوچکی ہو تو گویا نظریں ان دونوں حرکتوں کا سبب ہیں۔
اسی طرح ایک دوسری جگہ اور ارشاد ہے۔
من یکفل لی مابین لحییہ وبین رجلیہ اکفل لہ الجنۃ۔ (۶)
جو شخص مجھے دو باتوں کی ضمانت دے کہ جو اس کے دونوں جبڑوں کے درمیان( یعنی زبان) اور جو اس کے دونوں ٹانگوں کے درمیان(یعنی شرم گاہ) ہے تو میں اسے جنت کی ضمانت دیتا ہوں۔
اس (شرم گاہ) کی حفاظت اسی وقت ہوگی جب فکر وذہن پاک وصاف ہوں گے اور ان میں کسی بھی طرح کا فاسد خیال موجود نہ ہوگا کیوںکہ یہ تو ممکن ہی نہیں ہے کہ ذہن وفکر میں خیالات فاسدہ کا مینہ مجتمع ہو اور یہ امید کی جائے کہ اس کے قطر ے زمینِ قلب پر نہ پڑسکیں۔ یہ اس وقت ممکن ہے کہ جب نظر پاک وصاف ہو اور غیر محارم کی طرف نہ اٹھتی ہو۔
نظر کی حقیقت کو واضح فرماتے ہوئے نبیِ کریم صلی اللہ تعالیٰ علیہ وسلم نے ارشاد فرمایاہے:
ان النظر سہم من سہام ابلیس مسموم من ترکہ مخافتی ابدلتہ ایماناً یجر حلاوتہا فی قلبہ۔ (۷)
نظر شیطان کے تیروں میں سے ایک زہریلا تیر ہے جو اس (تیر) کو میرے خوف سے ترک کرتا ہے میں اسے ایمان کی نعمت بخشوں گا جس کی مٹھاس وہ اپنے دل میں پائے گا۔
حدیثِ مذکور سے یہ بات مستفاد ہوتی ہے کہ نظرِ بد میں شیطان کے وسوسوں کا ہیجان انگریز اثر ہوتا ہے اسی لیے تو جو نظروں کو نیچی نہیں رکھتے بلکہ ہر جگہ تانک جھانک میں لگے رہتے ہیں ان افراد سے اکثر شیطانی افعال کا ظہور ہوا کرتا ہے اور جو نظروں کو نیچا رکھتے ہیں وہ شرارتِ شیطان سے محفوظ ومامون بھی رہتے ہیں اور ایمان کی حلاوت سے لذت آشنا بھی ہوتے ہیں۔
دراصل نظر تو راہِ قلب کا بابِ اول ہے یہی وجہ ہے کہ جب کوئی چیز نظر نہیں آتی تو بعض اوقات دل اس کو قبول کرنے کے لیے تیار نہیں ہوتا۔ حضرت موسیٰ علیہ السلام کی قوم نے یہی تو کہاتھا(اگرچہ غلط مطالبہ تھا): لَنْ نُّؤمِنَ لَکَ حَتّٰی نَرَی اللّٰہَ جَہْرَۃً (ہم ہرگز ایمان نہیں لائیں گے تجھ پر جب تک ہم نہ دیکھ لیں اللہ کو ظاہر) اور جب کوئی چیز نظر آجاتی ہے تو وہ چیز بابِ نظر سے ہوتے ہوئے منزلِ قلب تک لمحوں میں پہنچ جاتی ہے اسی لیے تو حسنِ یوسف کو دیکھنے کے بعد نہ صرف زلیخا فریفتہ ہوئیں بلکہ زنانِ مصر اپنے آپ کو بھول گئیں اور اپنی انگلیوں کو کاٹ ڈالا۔
یہ بات آج کل کے مشاہدات میں بھی ہے کہ جب کوئی چیز دیکھ لی جاتی ہے تو وہ بہت جلدی دل میں اتر جاتی ہے۔ نظر دل کا دروازہ ہے اور دل پورے جسم کا ٹرانفسارمر جو پورے جسم میں کرنٹ سپلائی کرتا ہے۔ اس حقیقت کو بھی حدیثِ پاک میں یوں اُجاگر کیا ہے ’’ان فی جسد اٰدم لمضغۃ لوفسدت فسدا الجسد کلہ ولو صلحت صلح الجسد کلہ الا وھی القلب الا وہی القلب‘‘ کہ آدمی کے جسم میں ایک پارۂ گوشت ہے اگر اس میں فساد آیاتو سارے جسم میں فساد آیا اگر وہ اصلاح پذیر ہواتمام بدن اصلاح پذیر ہوا خبردار ہوجاؤ وہ دل ہے ہوشیار ہوجاؤ وہ دل ہے۔
اس کا اندازہ اس وقت کیا جاسکتا ہے کہ جب کوئی حور صفت دو شیزہ موجود ہو اور اس پر کسی کی نظر پڑی ہو اولاً تو وہ اپنی نگاہوں کو جھکالیتے ہیں لیکن پھر دل میں دیکھنے کا اشتیاق پیدا ہوتا ہے اگر کوئی اس اشتیاق کی بنا پر دوبارہ دیکھ لیتا ہے تو پھر اس کے جو اثرات دل پر مرتب ہوتے ہیں وہ قابلِ توجہ ہوتے ہیں۔
حقیقتِ نظرکواُجاگرکرتے ہوئے علامہ قرطبی تحریرکرتے ہیں
البصرھوالباب الاکبرالیٰ القلب یحسب ذلک کثر الشوط من جہتہ ووجب التحزیر منہ وغضہ واجب عن جمیع المحرمات وقل مایخشی الفتنۃ من اجلہ (۸)
نظر دل کی طرف کھلنے والا سب سے بڑا دروازہ ہے نگاہ کی بے راہ روی کے باعث ہی اکثر لغزش ہوتی ہے اس لیے اس سے بچنا چاہیے اور تمام محرمات سے اسے روکنا چاہیے بہت کم ایسا ہوتا ہے کہ اس کی وجہ سے فتنے سے بچاجاسکے۔
جب یہ نظر کی حقیقت ہے اور یہ اس کا نتیجہ ہے تو اب ہر صاحبِ عقل وخرد یہی کہے گا کہ ہاں! نظروں کو نیچا ہی رکھنا ضروری ہے اور اس کے لیے صرف نظروں کے نیچا رکھنے سے کام نہیں چلے گا بلکہ عورتوں کے لیے پردہ کرنے کی سخت تنبیہ کرنی ہوگی کیوں کہ اگر عورت بے پردہ ہوگی تو کب تک نظروں کو نیچا رکھا جائے گا کبھی بھی نظر خطا کرسکتی ہے۔پیٹرول کے پاس سے چنگاری کو دور رکھا جائے تب تو اس بات کا اطمینان رہے گا کہ آگ نہیں لگے گی ورنہ تو کون صاحبِ عقل ہے جو مطمئن رہے گا کہ اب آگ نہیں لگے گی۔
لہٰذاتمام اسلامی بھائی اور بہنیںاس حقیقت کو سمجھ لینے کے بعدنگاہ پر کنٹرول کرنے کی کوشش کریں۔ یہ کوئی بہت بڑی بات نہیںہے صرف دل میں اگر عمل کا پختہ ارادہ ہوجائے اور دل ہمہ وقت اللہ کی توفیق کا طلبگار رہے ۔’’ہرنفس کوموت کامزہ چکھناہے ‘‘کامسلم نظریہ پیش نظررہے تو کچھ بھی ناممکن نہیں۔ اسلامی بہنوں سے خصوصی گزارش ہے کہ پردہ جو کہ آپ کی عزت وآبرو کا محافظ ہے اس کو اپنائیں۔ میں دعوے کے ساتھ کہہ سکتا ہوں کہ اگر میری ہر بہن پردہ اختیار کرلے تو ضرور معاشرے سے بہت سارے گناہوں کی بیماریوں کا خاتمہ ہوسکتاہے جن سے آج پورا معاشرہ سسک اور کراہ رہا ہے۔
حوالہ جات

(۱) سورۂ نور آیت۳۰
(۲) سورۂ نور آیت۳۱
(۳) ضیاء القرآن جلد سوم صفحہ ۲۱۰
(۴) ایضاً
(۵) ضیاء القرآن جلد سوم صفحہ ۳۱۲
(۶) ایضاً