Qalam ke baare mein

(1)

 

Qalam ki nok par rakhuu.n ga is jahaa.n ko main

Zamee.n lapet ke rakh duu.n ki aasmaan ko main

(Mumtaaz)

 

Jis qalam ki qasam, saari kaainaat banaane waale Rab ne khaai ho, us mein koi baat zaruur hogi.

 

Taareekh ka sarsari jaaiza lene par aap ko pata chal jaaega ki duniya mein jo bhi inqilaab aaya hai, 

Woh yu.n hi nahi.n aaya, qalam ne laaya hai.

 

Yeh qalam qayaamat tak apna kaam karta rahe , qalamkaar paida hote rahe.nge.

 

(2)

 

Hazrat Qataada farmaate hain:

 

Qalam Allaah ki bohot badi ni'mat hai, agar qalam na ho to deen qaaim na rahe.

 

(Tafseer-e-Tabri, zair-e-aayat Al-Lazii 'Allama Bil-Qalam)

 

Yeh qalam hi tha, jis ne Quraan mahfuuz kiya.

Yeh qalam hi tha, jis ne Ahaadees-o-Sair jama’ kiye.

Yeh qalam hi tha, jis ne Fiqhi masaail likhe.

Yeh qalam hi tha, jis ne Tasawwuf ki baate.n ham tak poho.nchaaee.n.

 

Hazrat Qataada ne sach hi kaha hai ki qalam na ho to deen qaaim na reh sake.

 

(3)

 

Hame.n ma’luum hai ki log kitaabo.n se duur hote ja rahe hain. 

Teen teen ghante,

Paanch paanch ghante,

Saat saat ghante woh mobile par films, drama aur reels dekhte hain,

Magar koi kitaab agar, bees pachees minute bhi padhni pad jaae,

To aise be-zaar hote hain ki use phenk kar hi dam lete hain.

 

Aisi situation mein ham qalam kaaro.n ki zimmedaariyaa.n aur bhi badh jaati hain.

 

Ab hame.n usluub aasaan se aasaan aur tehreer mukhtasar se mukhtasar rakhni hogi,

Aur itni jaazib-o-purkashish ki

Qaari, na chaahte hue bhi padhne par majbuur ho jaae.

 

Mahaaimi.