خواتین اسلام اور ان کی اشک ریزیاں وشب خیزیاں

حضرت خنسا بنت خدام:

یہ عرب کی ایک حسین وجمیل عورت تھیںجن کی لالہ رخی اور ماہ جبینی اپنی مثال آپ تھی لیکن جب ان پر عشق الٰہی کا پرتو پڑا تو پھران کے رت جگوں اور عبادتوں کا یہ عالم ہوگیا کہ انھوں نے مسلسل چالیس سال تک روزے رکھے جس کے باعث ان کی جلدہڈیوں سے چپک گئی۔ خشیت مولامیں اتنا روئیں کہ ان کی آنکھیں جاتی رہیںاور اپنے پروردگار کو منانے کے لیے انھوں نے اتنا لمبا لمبا قیام کیا کہ آخر کار ان کے قدم کھڑے ہونے کے لائق نہ رہے۔

جب رات کی سیاہی چھا جاتی،دنیا نیند کی آغوش میں چلی جاتی اور لوگوں کی حرکات و سکنات بند ہوجاتیں تو وہ اپنی حزن آگیں آوازوں میںچیخ کر کہتیں: اے اہل اطاعت کے محبوب!طاعت گزاروں کے چہرے کب تک خاک کے ذروں پرالٹتے پلٹتے رہیں گے اپنا وعدہ پورا فرمااور ان کے اس مقصدو مراد کو پورا فرما جس کے لیے انھوں نے خود کو تھکا تھکا دیا ہے۔پھربے اختیار ہوکر زارو قطار اس قدر روتیں کہ ان کے پڑوس کے درودیوار تک رونے کی آوازپہنچ جاتی۔ 

حضرت طائوس یمانی اور وہب بن منبہ جیسے جلیل القدر ائمہ اسلام کی نگاہوں میں خنساء بنت خدام کی شب خیزیوں اور اشک ریزیوں کی بڑی قدر تھی۔(۱)

ریحانۂ مجنونہ:

حضرت ابوالربیع رحمہ اللہ کا بیان ہے کہ میں ، محمد بن منکدر اور ثابت بنانی ایک شب ‘ریحانہ مجنونہ کے پاس گئے تو ہم نے دیکھا کہ اِبتداے شب میں کھڑی ہوئیں اور مسرت و شادمانی کے اندازمیں یہ شعر پڑھا :

قام المحب إلی المؤمل قومۃً   

کاد الفؤاد من السرور یطیر

یعنی محب اپنے مرجع امید کے آگے اس طرح کھڑا ہے کہ اس کا دل خوشی سے اُڑتا جارہاہے۔ 

آدھی رات ہوئی تو ان کی زبان پر یہ اشعار تھے :

   لا تأنسن بمن توحشک نظـرتُہ

   فتمنعن مـن التـذکار في الظلـم

   واجہد وکدَّ وکن في اللیل ذا شجن

   لیسقیک کأس وداد العز و الکرم

یعنی اس سے اُلفت نہ رکھ جس کے نظر اُٹھانے سے تجھے وحشت ہوجائے کیوں کہ یہ شے اندھیروں میں تجھے ذکر سے روک دے گی، اور راہِ حق میں محنت ومشقت کر، اور رات کو غمزدہ رہ، اس کے عوض اللہ تعالیٰ تجھے اپنی دوستی اور بخشش کے جام سے نوازے گا۔

اور جب صبح کا وقت قریب ہوا تو حسرت ویاس سے آہ بھرنے لگیں اور نالہ کرنے لگیں، میں نے سبب پوچھا تو فرمایا :

ذہب الظلام بأنسہ و بالفہ

 لیت الظلام بأنسہ یتجدد

یعنی رات اپنی تاریکی کے ہمراہ اپنے انس اور محبت کو بھی لے گئی۔ کاش! یہ تاریکی اسی انس کے ساتھ بار بار آتی۔(۲)

حضرت منیفہ بنت ابو طارق: 

حضرت منیفہ کاشمار حبرین کی مشہور عابدات میں ہوتا تھا،جب رات کی تاریکی چھاتی توآپ اپنے نفس کو مبارک باد پیش کرتی ہوئی کہتیں کہ اے نفس! رات آگئی جس میں مومن کی آنکھوں کی ڈھندک اور دل کاسرور رکھاگیاہے، پھر آپ عبادت و ریاضت میں مشغول ہوجاتیں۔۔۔۔۔ آپ فرماتیں کہ قسم بخدا! جب تک میں اس دنیا میں زندہ ہوں کبھی بھی رات کی تاریکیوں میں نہیں سوئوںگی،بلکہ پوری رات اپنے مولاکے ذکر سے روشن رکھوں گی۔

حضرت عامر بن ملیک بحرانی ایک کنیزسے حکایۃً نقل کرتے ہیں کہ وہ ایک رات منیفہ بنت ابوطارق کے یہاں شب باش ہوئی،تواس نے دیکھا کہ قیام لیل میں انھوں نے اس آیت کی تکرار کرتے کرتے صبح کردی :

وَ کَیفَ تَکْفُرُونَ وَ أنتُمْ تُتْلٰی عَلَیکُمْ آیَاتِ اللّٰہِ وَ فِیْکُمْ رَسُولُہُ، وَمَنْ یَّعْتَصِمْ بِاللّٰہِ فَقَدْ ہُدِيَ إلٰی صِرَاطٍ مُّسْتَقِیْمٍ o (سورۂ آل عمران: ۳؍۱۰۱)

اور تم (اب) کس طرح کفر کروگے حالاں کہ تم وہ (خوش نصیب) ہو کہ تم پر اللہ کی آیتیں تلاوت کی جاتی ہیں اور تم میں (خود) اللہ کے رسول(صلی اللہ علیہ وسلم) موجودہیں، اور جو شخص اللہ(کی رسی) کو مضبوط پکڑ لیتاہے تو اسے ضرور سیدھی راہ کی طرف ہدایت کی جاتی ہے۔(۳)

حبیبہ عدویہ:

حضرت حبیبہ عدویہ اپنے وقت کی عظیم عابدہ ومجاہدہ ہوئی ہیں۔ان کے حوالے سے آتاہے کہ جب وہ عشا کی نماز پڑھ لیتیں تو اپنے مکان کی چھت پر چڑھ جایا کرتیںاور اپنے جسم کے اِرد گرد کرتا اور دوپٹہ کس کر کہتی تھیں: اے اللہ! ستارے نکل آئے ہیں، آنکھیں نیند سے بوجھل ہوگئی ہیں، بادشاہوں نے اپنے دروازے بند کرلیے ہیں، عاشق اپنے معشوق کے ساتھ خلوت میں چلے گئے، اور میں تیری بارگاہ میں حاضر ہوگئی ہوں۔ پھر وہ اپنی نماز میں مشغول ہوجاتیں۔ جب فجر کا وقت ہوجاتا تو کہتیں: اے اللہ! یہ رات رخصت ہوگئی ہے اور دن نکل آیاہے، مجھے نہیں معلوم کہ میری یہ رات تو نے قبول کی ہے یا نہیں؟ اگر قبول کرلی ہے تو میں اپنے آپ کو مبارک باد پیش کروں ورنہ اس کی تعزیت کروں۔تیری عزت کی قسم! یہ میرا معمول رہے گا جب تک تو مجھے زندہ رکھے گا۔ اگر تونے مجھے اپنے در سے جھڑک دیا تب بھی میں کبھی تیرا در نہ چھوڑوں گی؛ اس لیے کہ میرا دل تیرے جودو کرم کے اَنوار سے روشن ہے۔ (۴)

حضرت عمرہ: 

مشہورِ زمانہ بزرگ حضرت حبیب عجمی رحمۃ اللہ علیہ کی زوجۂ محترمہ حضرت عمرہ بھی اپنے وقت کی بڑی عابدہ و زاہدہ ہوئی ہیں۔ ایک رات وہ نمازوں میں مشغول تھیں اور ان کے شوہر ابھی تک سورہے تھے۔ وقت ِسحر قریب آگیا اور وہ یوں ہی سوئے رہے۔تو حضرت عمرہ نے انھیں بیدار کرکے کہا:شوہرنامدار!اب تو اُٹھیے،دیکھئے کاروانِ شب کوچ کرچکاہے، سپیدۂ سحرنمودار ہونے کو ہے، آپ کے سامنے ایک لمبا سفر ہے، اور زادِ راہ کچھ بھی نہیں۔ صالحین کے قافلے ہمارے سامنے رخصت ہوگئے اور ہم یہیں کے یہیں پڑے رہ گئے۔(۵)

اللہ اکبر! یہ بات کس قدر پاکیزہ اور عمدہ ہے! اور وہ گھر کس قدر باسعادت اور خوش نصیب ہے جس میں ایسی بات کہی اور سنی جائے۔اور اس بات کو کہنے والی خاتون کس قدر شان وعظمت والی ہے!۔اللہ ہمارے گھروں میں بھی ایسی باتیں جاری فرمائے۔ پیارے آقا صلی اللہ علیہ وسلم نے ایسی عورت کے لیے بطورِ خاص دعاکی ہے جو رات کو اُٹھ کر عبادت کرتی ہے اور اپنے شوہر کو بھی اسی غرض سے بیدار کرنے کوشش کرتی ہے۔

حضرت عجردہ عمیہ:

آپ کے بارے میں آتاہے کہ وہ رات بھر عبادت کرتی تھیں حالاں کہ آنکھوں سے معذور تھیں مگر جب سحر کا وقت ہوتا تو اونچی اور غمگین آواز میں کہتیں: عابدوں نے تجھ تک پہنچنے ہی کے لیے رات کی مسافت طے کی ہے۔ وہ تیری رحمت اور فضل ومغفرت کی طرف سبقت کرتے ہیں۔ اے اللہ! میں تجھی سے مانگتی ہوں، تیرے غیر سے نہیں مانگتی کہ مجھے سبقت کرنے والوں میں سر فہرست کر اور مجھے علیین میں مقربین کا درجہ عطا کر اور مجھے اپنے نیک بندوں میں شامل کر، تو انتہائی رحم اور کرم والاہے، تو تمام بڑوں سے بڑا اور تمام بلندیوں سے بلند ہے۔ یہ دعا مانگ کر وہ سجدے میں گرجاتیں یہاں تک کہ ان کے سجدے میں گرنے کی آواز آس پاس میں سنی جاتی،پھر وہ سجدے ہی میں صبح کی نماز تک دعائیں مانگتی رہتیں اور روتی رہتیں۔(۶)

حضرت بریرہ:

حضرت ابن العلاء السعدی کہتے ہیںکہ میری چچازاد بہن’’بریرہ‘‘ بڑی عبادت گزار ونہایت پرہیزگار خاتون تھیں۔ وہ کثرت سے تلاوت کلام اللہ کیا کرتی تھیں اور تلاوت کے دوران مسلسل روتی رہتیں۔ زیادہ رونے کے باعث ان کی آنکھیں بھی بیکار ہوگئی تھیں۔

ایک مرتبہ ہم سب چچا زاد بھائیوں نے پروگرام بنایا کہ بریرہ کے پاس جائیں گے اور اس قدر رونے پر انھیں ملامت کریں گے؛ چنانچہ ہم سب ان کے یہاں پہنچے اور ان کی خیروعافیت دریافت کی۔ انھوں نے کہا: ہم اجنبی مہمان زمین پر پڑے ہوئے ہیں اور منتظر ہیں کہ کوئی ہمیں بلائے اور ہم جائیں۔ ہم نے ان سے کہا کہ آپ اس طرح کب تک روتی رہیں گی،اب تو آنکھیں بھی چلی گئیں۔ انھوں نے کہا: اگر اللہ کے یہاں میری آنکھوں کے لیے کچھ بہتری ہے تو مجھے ان کے ضائع ہوجانے پر کوئی ملال نہیں ہے اور اگر اللہ کے یہاں ان کی کچھ برائی ہے تو پھر انھیں اور رونا چاہیے۔ان کی یہ عارفانہ بات سن کر ہم میں سے کسی شخص نے کہا کہ یہاں سے چلو، ان کا حال دوسرا ہے،ان کا حال ہمارے جیسا نہیں ۔(۷)

حضرت رحلہ :

حضرت خواص فرماتے ہیں کہ ہم مشہور عابدہ ’’رحلہ‘‘ کے یہاں گئے۔ انھوں نے اتنے روزے رکھے تھے کہ ان کی رنگت سیاہ پڑ گئی تھی، اس قدر آنسو بہائے تھے کہ آنکھوں سے محروم ہوگئی تھیں اور اس قدر نمازیں پڑھی تھیں کہ چلنے پھرنے سے معذور ہوگئی تھیں۔ جس وقت ہم لوگ ان کے پاس پہنچے وہ بیٹھی ہوئی نمازیں پڑھ رہی تھیں۔ 

ہم نے انھیں سلام کیا اور اللہ تعالیٰ کے عفووکرم اورفضل واِحسان پر کچھ گفتگو کی تاکہ وہ اپنے نفس پر قدرے نرمی کریں۔ ہماری بات سن کر انھوں نے ایک چیخ ماری اور کہنے لگیں کہ میں اپنے نفس سے زیادہ واقف ہوں؛ اس لیے میرا دل زخمی ہے اور کلیجہ چھلنی ہے۔ سوچتی ہوں کاش! اللہ تعالیٰ نے مجھے پیدا ہی نہ کیا ہوتااور میں کوئی قابل ذکر چیز ہی نہ ہوتی۔ یہ کہہ کر وہ پھر نماز میں مشغول ہوگئیں۔(۸)

منقول ہے کہ حضرت بایزید بسطامی قدس سرہ کے زمانے میں ایک عورت کی عبادت وریاضت اور اس کی گریہ وزاری کا بڑا چرچا تھا۔حضرت بایزید ایک مرتبہ اس کی ملاقات کے لیے گئے اور اس سے کمالِ شفقت سے فرمایاکہ اے نیک بخت! بہت نہ رویا کرکیوں کہ زیادہ رونا بینائی کو ضرر پہنچاتاہے۔ یہ سن کر اس نیک خاتون نے بے ساختہ جواب دیا: اے شیخ! جن آنکھوں کو قیامت کے دن دیدارِ الٰہی کی دولت نصیب ہونے والی ہے انھیں دنیا میں اندھی ہوجانے کا کوئی غم نہیں اور جو آنکھیں اس نعمت سے محروم رہیں وہ یقینا اس قابل ہیں کہ اندھی ہی ہوجائیں۔(۹)

حضرت عبد اللہ بن الحسن کہتے ہیںکہ میری ایک رومی باندی تھی اور میں اسے بہت چاہا کرتاتھا۔ ایک شب وہ میرے پہلو میں لیٹی ہوئی تھی، میری آنکھ لگ گئی، رات کے کسی پہر آنکھ کھلی تو میں نے محسوس کیا کہ وہ بستر پر نہیں ہے۔ میں اسے تلاش کرنے کے لیے بستر سے اُٹھا، میں نے دیکھا کہ وہ سجدے میں پڑی زار و قطار رو رہی ہے اور کہہ رہی ہے کہ اے اللہ! اس محبت کی وجہ سے جو تجھے میرے ساتھ ہے میری مغفرت فرما۔ میں نے کہا: یوں مت کہہ کہ جو محبت تجھے میرے ساتھ ہے بلکہ یوں کہہ کہ جو محبت مجھے تیرے ساتھ ہے۔ وہ کہنے لگی اے میرے آقا! اسی محبت کی وجہ سے اس نے مجھے شرک سے نکال کر اسلام تک پہنچایا اور اسی محبت کی وجہ سے اس نے میری آنکھ کو جاگنے کی قوت بخشی جب کہ اس کی مخلوق خوابِ راحت میں مست ہوتی ہے۔ (۱۰)

حضرت محمد بن قدامہ فرماتے ہیںکہ میںنے ابوبشر کو کہتے سنا کہ حضرت منصور بن معتمر کی ایک ہمسایہ تھی، جس کے پاس دو نیک بچیاں تھیں جو صرف رات گئے اس وقت چھت پرچڑھتیں جب لوگ سوچکے ہوتے۔ ان میں سے ایک نے ایک دن اپنی ماں سے پوچھا: امی جان! فلاں چھت کے اوپر جو ستون کھڑا رہتاتھا، وہ اب کہاں چلا گیا، کئی دنوں سے نظر نہیں آیا۔ ماں نے کہا: بیٹی! وہ کوئی ستون نہیں تھا بلکہ وہ وقت کے عظیم بزرگ حضرت منصور بن معتمرتھے جو پوری رات بیدار رہتے اور ابھی ایک رکعت بھی نہ پوری کرپاتے کہ شب کا سفرختم ہوجاتا۔

بیٹی نے تعجب سے کہا: امی جان! کیا وہ عبادت وبندگی کی اس منزل پر فائز تھے!، یقینا محض ایسی جی توڑ عبادتیں ہی آتش جہنم سے بچائوکا ذریعہ بن سکتی ہیں۔ خیر! تو ان کا کیا بنا جو کئی دنوں سے نظر نہیں آئے؟۔فرمایا: وہ انتقال کرگئے۔۔۔۔۔

یہ سن کر بیٹی نے کہا کہ امی جان! میرے لیے ایک چھوٹا سا گھروندا بنا دیجیے جہاں میں عبادت و ریاضت کرسکوں۔ چنانچہ میں نے اس کے لیے بالوں کاایک گھروندا بنادیا۔ دیکھا دیکھی اس کی دوسری بہن بھی اس میں اُتر گئی، اور دوونوں نے بیس سال تک مسلسل اللہ کی عبادت وبندگی میں گزار دی، حال یہ تھاکہ دونوں رات بھرجاگتیں اور دن میں روزے رکھتیں۔ (۱۱)

ایک مردِ صالح کے ہمسایوں میں ایک ضعیفہ خاتون تھیں جو کبیر السن ہونے اور ضعف وناتوانی کے باوجود مجاہدہ وریاضت میں بے حد سعی کیا کرتی تھیں،اور ان کی راتیں آبادرہا کرتی تھیں ۔ اس مردِ صالح کو اس کی حالت پر ترس آیا۔ اس نے ایک روز کہا: آپ کو اس قدر محنت ومشقت نہیںکرنی چاہیے۔ کچھ اپنے جسم اور اعضا کو بھی آرام دیجیے ، اس باخدا ضعیفہ نے جواب دیا :

اگر میں اپنی جان کو آرام دینے لگوں تو مالک حقیقی کے دروازے سے علاحدہ اور دور ہوجائوںگی اور جو دنیوی مشاغل کے باعث اس سے دور ہوا، اس نے خود کو عظیم آزمائش میں ڈالا اور سعی وکوشش کے ساتھ عمل کروں تو بھی میرے عمل کی حیثیت کتنی؟، اگر اس میں بھی کوتاہی کرنے لگوں پھر باقی کیا بچے گا!۔ حسرت وغم ان کو جو آگے بڑھیں، فراق ان کا جو محبوب سے دور رہیں۔ آگے بڑھنے والوں کی حسرت یہ کہ محشر کے لیے جب مردے قبروں سے اُٹھیں، صالحین نور کے براق پر سوار جنت کو جائیں اور انھیں دوستوں کے رتبے ملیں، حوروغلمان ان کی خدمت کو دست بستہ ایستادہ ہوں اور پیچھے والے کف افسوس ملتے رہ جائیں۔ اس وقت حسرت وغم سے اُن کے دل پارہ پارہ ہوکر بہہ جائیں گے۔

لوگ جب میدانِ قیامت میں الگ الگ ٹولیوں میں تقسیم کیے جائیں گے تو رب ذو الجلال سب کو یکجا فرمائے گا، ایک اعلان کرنے والا اعلان کرے گا : اے گنہ گارو!آج تم الگ ہوجائو۔ اوراللہ کے پرہیزگار بندے بامراد ہوئے ۔ اس روز شوہر اپنی بیوی سے، بیٹا ماں باپ سے، اور دوست دوست سے الگ ہوجائے گا۔ کوئی کسی کے کام نہ آئے گا۔ نفسانفسی کا عالم ہوگا۔ کسی کو عزت وتکریم سے بہشت بریں میں لے جایاجائے گا،اور کوئی پابجولاں گھسیٹ کر آتش جہنم میں جھونک دیاجائے گا۔جدا جدا راستے اور منزلیں ہوں گی۔ آنکھوں سے اشکوں کے سمندر رواں ہوں گے۔ جدائی وفراق کے عالم میں ایک دوسرے کو حسرت سے تکیں گے۔ ذرا اُن مناظر کو سوچو تو سہی تمہاری نیندیں نہ اُڑ جائیں تو کہنا اور جبینیں مولا کے حضور نہ جھک جائیں تو کہنا۔۔۔۔(۱۲)

عارفہ کنیز:

حضرت حسن بن صالح علیہ الرحمہ کے پاس ایک لونڈی تھی انھوں نے اسے کسی کے ہاتھوں بیچ ڈالا۔جب آدھی رات ہوئی تو وہ لونڈی اُٹھی اور اس نے کہا: گھر والو! اُٹھو اور نماز پڑھو۔ انھوں نے پوچھا: صبح ہوگئی ہے جو نماز پڑھیں!۔ لونڈی نے کہا: تم فرض نماز کے سوا کوئی نماز نہیں پڑھتے؟۔انھوں نے جواب دیا: نہیں۔اس کے بعد وہ لونڈی حضرت حسن بن صالح کے پاس بھاگ آئی اور کہا: آپ نے مجھے ایسے لوگوں کے ہاتھ بیچ ڈالاہے جو شب بیداری اور دولت تہجد سے عاری ہیں؛ لہٰذا مجھے واپس لے لیں چنانچہ انھوں نے ایساہی کیااور دام لوٹادیے۔

حضرت شعوانہ:

حضرت معاذ بن فضل فرماتے ہیں کہ شعوانہ اس قدر رویاکرتی تھیں کہ ہمیں ان کے اندھے ہوجانے کا خوف لاحق ہوگیا۔ ہم نے جب اس سلسلہ میں ان سے عرض کیا تو انھوں نے فرمایا:اللہ کی عزت کی قسم! اللہ کی خشیت میں روروکردنیا کے اندر اندھا ہوجانااس سے بہتر ہے کہ آخرت میں جہنم کی آگ اندھاکرے۔(۱۳)

حضرت یحییٰ بن بسطام کہتے ہیں کہ میں شعوانہ کی مجلس میں حاضر ہوتا تھا اور دیکھتا تھا کہ وہ کس قدر رویا کرتی ہیں اور کس شدت سے گریہ وزاری کیا کرتی ہیں۔ ایک دن میں نے اپنے ایک ساتھی سے کہا کہ کسی دن تنہائی میں ملاقات کرکے ہم ان سے کہیں گے کہ وہ اپنے نفس کے ساتھ تھوڑی نرمی کا معاملہ کریں۔ ساتھی نے میری اس تجویز سے اتفاق کیا؛ چنانچہ ایک موقع تلاش کرکے ہم لوگ ان کی خدمت میں حاضر ہوئے اور عرض کیاکہ کیا اچھا ہواگر آپ نفس کے ساتھ کچھ نرمی برتیں اور اس کثرتِ گریہ وبکا میں کچھ کمی کریں،جو آپ چاہتی ہیں اس نرمی سے اس پر بڑی مدد ملے گی۔

یہ بات سن کر وہ روتے ہوئے کہنے لگیں: بخدا میں اس قدر رونا چاہتی ہوں کہ میرے آنسو خشک ہوجائیں۔ پھر خون کے آنسو روئوں؛ یہاں تک کہ میرے جسم سے خون کا ایک ایک قطر ہ آنسو بن کر آنکھوں سے بہہ جائے لیکن میں کہاں روتی ہوں، مجھے رونا کب نصیب ہوتاہے؟ یہ جملے انھوںنے کئی مرتبہ کہے اور وہیںبے ہوش ہوگئیں۔ (۱۴)

حضرت مالک بن ضیغم فرماتے ہیںکہ اہل اَبلہ کا ایک شخص اکثر میرے والد کے پاس آیا کرتا،اور شعوانہ کی گریہ وبکاکی داستان بیان کیا کرتاتھا، تو ایک دن میرے والد نے اس سے فرمایا: آج ذرا مجھ سے اس کے رونے کی کیفیت بیان کرو۔کہا:قسم بخدا! وہ صبح وشام روتی ہی رہتی ہے،رونے دھونے کے علاوہ اس کا کوئی کام ہی نہیں۔ 

والد نے کہا: میری مراد یہ نہیں، میں یہ جانناچاہتاہوں کہ اس کے رونے کی ابتدا کیوں کر ہوتی ہے؟کہا: اے مالک! جیسے ہی وہ ذکر مولا سنتی ہے زاروقطار رونے لگتی ہے، اس کی آنکھیں سیلاب بن جاتی ہیں،اور اس کی پلکوں سے آنسوکے قطرے خشیت مولا کے موتی بن کر ٹپکنے لگتے ہیں۔۔۔۔۔ 

یہ سن کر میرے والد بھی رونے لگے اور فرمایا: یقیناخوف کی چنگاری نے اس کے دل کے چاروں کونے جلا ڈالے ہیں۔ مزید فرمایا: آنسوئوں کی کمی بیشی دل کی جلن پرموقوف ہوتی ہے،جتنا دل جلتاہے اُتناآنسوبہتا ہے، حتیٰ کہ جب پورا دل سلگ اُٹھتاہے تو اس سے حزن و اُداسی جنم لیتی ہے اور یہ حزن اسے سدا رونے پر انگیخت کرتارہتاہے، اور جب کسی کا یہ حال ہوجائے تو ایک ذرا سا ذکربھی اسے پرغم بناکرآمادۂ گریہ وبکا کردیتاہے۔(۱۵)

شعوانہ اپنی دعا میں یوں کہاکرتی تھیں : اے اللہ! مجھے تیری ملاقات کا کتنا شوق ہے اور تیری جزاپانے کی کس قدر اُمید ہے۔ تیری ذاتِ کریم سے امید کرنے والوں کی امیدیں مایوسی سے نہیں بدلتیں اور نہ مشتاقین کا شوق ضائع جاتاہے۔ اے اللہ! اگر میری موت کا وقت آچکاہے اور میرے کسی عمل نے مجھے تجھ سے قریب نہ کیا ہو تو میں اپنے گناہوں کا اعتراف کرتی ہوں۔ اگر تو مجھے معاف کردے گا تو اس سلسلہ میں تجھ سے بہتر کون ہے۔ اور اگر مجھے عذاب دے گا تو تجھ سے زیادہ عادل کون ہے۔ اے اللہ! میں نے اپنے نفس کے لیے نظر کی جسارت کی، اب تیرے حسن نظر کی اُمید ہے۔ اگر تونے مجھ پر نظر کرم نہیں فرمائی تو یہ تباہ وبرباد ہوجائے گی۔ اے اللہ! تو نے تمام زندگی مجھ پر احسانات فرمائے ہیں، مرنے کے بعد بھی مجھ سے اپنے احسانات کا سلسلہ منقطع نہ کرنا۔ جس ذات نے زندگی میں مجھے اپنے کرم واحسان کا مستحق سمجھاہے اسی ذات سے مجھے یہ امید ہے کہ وہ موت کے بعد بھی مجھ پر بخشش کا دروازہ کھولے رکھے گی۔اے اللہ! جب تو زندگی میں میرا ذمہ دار رہا تو مرنے کے بعد میں تیری نظر کرم سے کیسے مایوس ہوں!۔ اے اللہ! ایک طرف مجھے میرے گناہ ڈراتے ہیں دوسری طرف جو محبت تجھ سے ہے اس سے دل مطمئن ہوتاہے۔ میرے معاملے میں اپنی شان کے مطابق نظر فرما اور اس شخص کو بھی اپنے فضل واحسان سے محروم نہ کر جو جہالت کے نشے میں مدہوش ہے۔ اے اللہ! اگر تو میری رسوائی چاہتا تو مجھے ہدایت کیوں دیتا!، اور میری ذلت چاہتا تو میرے گناہوں کی پردہ پوشی کیوں فرماتا؟۔ اے اللہ! جس سبب سے تونے مجھے ہدایت دی ہے اسے قائم رکھ اور جس سبب سے تو میری پردہ پوشی کرتاہے اسے دائم رکھ۔ اے اللہ! میں نہیں سمجھتی کہ جس مقصد کے لیے میں نے عمر لگائی ہے اسے تو نامنظور کردے گا۔ اگر میں نے گناہ نہ کیے ہوتے تو مجھے تیرے عذاب کا خوف نہ ہوتا اور اگر مجھے تیرے کرم کا علم نہ ہوتا تو میں تیرے اَجروثواب کی امیدوار نہ ہوتی۔(۱۶)

انھیں کی دعا پر میں اپنا مضمون ختم کرتی ہوںاس دعا کے ساتھ کہ اللہ تبارک و تعالیٰ ہمیں بھی ان اللہ والیوں کے نقش قدم پر چل کر شب خیزی اور اَشک ریزی کی دولت بیدار سے نوازے، نیز آئندہ نسلوں تک ہمیں یہ وراثت منتقل کرنے کا جذبہ وخروش عطافرمائے۔آمین۔

ماخذومراجع

(۱)   صفۃ الصفوۃ: ۱؍۲۴۶۔ 

(۲)   روض الریاحین:۷۱بحوالہ بزم اولیاء: ۱۳۸تا۱۳۹۔

(۳)   صفۃ الصفوۃ: ۴۱۸۔

(۴)   احیاء علوم الدین: ۴؍۴۱۴…صفۃ الصفوۃ:۱؍ ۴۰۶۔