جن اعمال کا ثواب مسلسل ملتا رہتا ہے

ازقلم : از:مفتی محمد صدیق ہزاروی

عن ابی ہریرۃ رضی اللّٰہ عنہ ان رسول اللّٰہ صلی اللّٰہ علیہ وسلم قال اذا مات الانسان انقطع عملہ الا من ثلاث صدقۃ جاریۃ او علم ینتفع بہ او ولد صالح یدعولہ (مشکوٰۃ المصابیح)

حضرت ابوہریرہ رضی اللہ عنہ سے مروی ہے کہ رسول اللہ صلی اللہ تعالیٰ علیہ وسلم نے فرمایا: جب آدمی مرجاتا ہے تو اس کے عمل کا سلسلہ ختم ہوجاتا ہے البتہ تین باتوں میں (جاری رہتا ہے) صدقہ جاریہ یا وہ علم جس سے نفع حاصل کیا جائے یا نیک اولاد جو اس کے لیے دعا کرے۔

پیدائش سے لے کر موت تک کا وقت دارالعمل ہے اور قبر سے نکل کر میدان محشر میں جانے اور اس کے بعدکو دارالجزاء کہا جاتا ہے درمیان میں عالم برزخ ہے جو درحقیقت انتظار کا عالم ہے۔

جنوں اور انسانوں کی تخلیق کا مقصد عبادت خداوندی بتایاگیا اس لیے دنیوی زندگی یعنی دارالعمل میں انسان کو عبادات کا مکلف بنایاگیا ہے اور اس کے لیے اسے وہ تمام قوت وطاقت عطا کی گئی جو عبادت کی ادائیگی کے لیے ضروری ہے۔

اللہ تعالیٰ نے اسے جسمانی طاقت، عقل ودانش کی دولت اور اختیار کی نعمت عطا کرنے کے بعد عبادات کا مکلف بنایا لیکن جب انسانی جسم سے روح کا رشتہ منقطع ہوجاتا ہے تو عمل کا سلسلہ ختم ہوجاتا ہے کیوںکہ اس وقت انسان دارالعمل سے عالم برزخ کی طرف کوچ کر جاتا ہے لیکن اللہ تعالیٰ اپنے فضل وکرم سے اس وقت بھی اسے محروم نہیں رکھتا اور اسے ثواب ملتا رہتا ہے اگر اس نے وہ کام کیے ہوں جن کا اس حدیث شریف میں ذکر کیا گیا یعنی وہ اعمال کا مکلف نہ رہنے کے باوجود ثواب کی دولت سے بہرہ مند ہوتا رہتا ہے۔

 ان تین اعمال میں سے پہلا عمل صدقہ جاریہ ہے۔صدقہ دو قسم کا ہوتا ہے۔ ایک صدقہ وقتی ہوتا ہے مثلاً واجب صدقے کی صورت میں غربا ومساکین کو یا نفلی صدقے کی صورت میں عام مسلمانوں کو کھانا کھلایا تو اس کا ثواب اسے ضرور ملتا ہے بشرطیکہ شہرت اورریا کاری کے بجائے رضائے الٰہی مقصود ہو لیکن یہ ثواب ایک مرتبہ مل جاتا ہے۔ ثواب ملنے کا سلسلہ جاری نہیں ہوتا۔ دوسری قسم صدقہ جاریہ ہے اس کا ثواب جاری رہتا ہے ۔صدقہ جاریہ اس صدقے کو کہتے ہیں جس سے مسلسل نفع اندوزی ہوتی رہے مثلاً مسجد بنائی، مسجد میں پنکھا لگایا، چٹائی بچھائی یا اس طرح کی دیگر اشیا جن سے نمازیوں کو فائدہ پہنچتا ہے۔ دینی مدرسہ بنایا، کسی طالب علم کو یا کسی بھی مستحق صاحب ذوق کو دینی کتب خرید کردیں، کنواں کھدوا کر وقف کردیااور کسی گزرگاہ پر پانی کی سبیل بنادی تاکہ آنے جانے والے لوگ اس سے پانی پئیں غرضیکہ ہر وہ کام جس سے مخلوق خدا کو ہمیشہ فائدہ پہنچتا رہے صدقہ جاریہ ہے۔ جب تک لوگ اس سے مستفید ہوتے رہیں گے اس شخص کے نامہ اعمال میں ثواب لکھا جاتا رہے گا اگرچہ وہ دنیا سے رخصت ہوگیا ہو۔اس لیے ہماری یہ کوشش ہونی چاہیے کہ اپنا روپیہ پیسہ ان کاموں پر خرچ کریں جن سے انسانیت بلکہ مخلوق خدا کو فائدہ پہنچے۔ رسول کریم صلی اللہ تعالیٰ علیہ وسلم نے فرمایاخیر الناس من ینفع الناسترین انسان وہ ہے جو لوگوں کو نفع پہنچاتا ہے۔ بعض کام اگرچہ ذاتی طور پر بڑے اچھے کام ہوتے ہیں اور مسلمان ان کاموں پر لاکھوں روپیہ خرچ کرتے ہیں لیکن وہ صدقہ جاریہ میں نہیں آتے جب کہ ان کے مقابل بعض ایسے کام ہیں جہاں مال خرچ کرنے کی سخت ضرورت بھی ہوتی ہے اور صدقہ جاریہ کا ثواب بھی ملتا ہے لیکن عام طور پر ان سے روگردانی کی جاتی ہے اور ایسی جگہوں پر مال خرچ کرنے کو اہمیت نہیں دی جاتی۔

اس میں کیاشک ہے کہ رسول کریم صلی اللہ تعالیٰ علیہ وسلم کی نعت تسکینِ جان کا سبب ہے، محبت رسول کریم صلی الہ تعالیٰ علیہ وسلم کی آئینہ دار ہے، ان محافل کا انعقاد روحانی جلا کا باعث ہے اور اپنے آقا سے رشتہ محبت وعقیدت قائم کرنے کا اہم ذریعہ ہے لیکن ان پر لاکھوں روپئے خرچ کردینااور جہاں اسی آقا صلی اللہ تعالیٰ علیہ وسلم کے دین کی تعلیم کااہتمام ہو ان مدارس کو نظرانداز کردینا قطعاً دانش مندی نہیں۔ دینی اداروں کا قیام اور ان میں علم حاصل کرنے والے طلبہ کے قیام وطعام، کتب اور دیگر ضروریات کا اہتمام کرنا صدقہ جاریہ بھی ہے اور دین اسلام کے فروغ کا باعث بھی لہٰذا اس طرف خصوصی توجہ کی ضرورت ہے۔ اسی طرح جو تنظیمیں اور جماعتیں فروغ دین اور اصلاح اُمت کے لیے کوشاں ہیں ان سے تعاون کرنا، اسلامی لٹریچر چھپوا کر تقسیم کرنا بھی ہماری خصوصی توجہ کا مستحق ہے۔

دوسرا عمل جس کا ثواب انسان کو مرنے کے بعد بھی ملتا رہتا ہے وہ علم ہے جس سے اُمت مسلمہ کو نفع حاصل ہوتا رہے اگرچہ اس میں بنیادی طور پر وہ علوم شامل ہیں جن کاآخرت کے سنوارنے سے تعلق ہے لیکن ان فنون کو بھی اس میں شامل کیا جاسکتا ہے جن کے ذریعے انسانی زندگی کی آسانی کا سامان پیدا ہوتا ہے ایسی مصنوعات تیار ہوتی ہیں جن سے انسانیت نفع اندوز ہوتی ہے کیوںکہ جہاں حقوق العباد کی ادائیگی اور ان سے آگاہی ضروری ہے وہاں حقوق العباد کی ادائیگی اور ان حقوق سے متعلق علم حاصل کرنا اور اسے پھیلانا بھی لازمی ہے۔

رسول کریم صلی اللہ تعالیٰ علیہ وسلم نے محض علم کا ذکر نہیں فرمایا بلکہ اس کے ساتھ ینتفعکے الفاظ ارشاد فرما کر اس بات کی طرف اشارہ فرمایا کہ اس علم سے دوسروں کو فائدہ پہنچے کیوںکہ اس صورت میں یہ عمل جاری ہوگا اور اس کا ثواب بھی جاری ہوگا۔اگر کوئی شخص علم حاصل کرکے اسے اپنی ذات تک محدود رکھتا ہے خود اس پر عمل پیرا ہوتا ہے لیکن دوسروں کو اس کے علم سے فائدہ نہیں پہنچتا تو وہ اس بشارت میں شامل نہیں۔ افسوس ناک صورت حال یہ ہے کہ بعض اہل علم اپنے علم سے لوگوں کو فائدہ نہیں پہنچاتے اور جب کوئی حاجت منداُن سے مسئلہ دریافت کرتا ہے تو وہ عدیم الفرصتی کا بہانہ بنا کر جان چھڑالیتے ہیں۔ 

علم کو نفع بخش بنانے کی صورت یہ ہے کہ درس وتدریس، تعلیم وتعلم، تبلیغ واصلاح اور تصنیف وتالیف کے ذریعے اس علم سے دوسروں کو نفع بھی پہنچایا جائے اور یوں اس علم کو باقی بھی رکھا جائے۔

صاحب علم دنیا سے رخصت ہوجاتا ہے لیکن وہ اپنے شاگردوں، اپنی تصانیف اور استفادہ کرنے والوں کی صورت میں زندہ رہتا ہے اور مسلسل ثواب حاصل کرتا رہتا ہے۔ اگر کوئی شخص عالم نہیں ہے لیکن وہ علمی مرکز قائم کرکے کسی تعلیمی ادارے میں کتب فراہم کرکے فروغ علم میں شریک ہوتا ہے تو اسے بھی اس علم کا ثواب ملتا رہتا ہے جو اس نے اس ادارے یا کتب کی صورت میں چھوڑا ہے اور ایک عرصے تک لوگ اس سے فائدہ حاصل کرتے رہیں گے۔

تیسرا عمل جس کاثواب مسلمان کو مرنے کے بعد بھی ملتا رہتا ہے اس کی نیک اولاد ہے اگرچہ نیک اولاد بذات خود اپنے نیک کاموں کی وجہ سے باپ کے لیے ثواب کا باعث ہوتی ہے کیوںکہ باپ کی تربیت وہ عمل ہے جواولاد صالح ہونے کا سبب ہے یعنی باپ کی تربیت نے اسے نیک بنایا اب چونکہ ان نیک اعمال کا سبب ماںباپ کی تربیت ہے لہٰذا اس بنیاد پر جب تک وہ نیک اعمال کرتا ہے ان کو ثواب ملتا رہے گا لیکن اس کے ساتھ ’’یدعولہ‘‘ کی قید لگا کر آپ نے اس بات کی طرف اشارہ کیا کہ نیک اولاد اپنے ماںباپ کے لیے دعا مانگتی ہے، ان کے لیے فاتحہ خوانی اور ایصال ثواب کا اہتمام کرتی ہے اور اس طرح بھی اس کو ثواب ملتا رہتا ہے۔

یہاں اس بات کو پیش نظر رکھنا بھی ضروری ہے کہ اعمال کا ثواب صرف ایمان واسلام کی صورت میں ملتا ہے لہٰذا یہاں اگرچہ لفظ انسان مطلق فرمایا جو کافر اور مسلمان سب کو شامل ہے لیکن الانسان میں الف لام سے خاص انسان کی طرف اشارہ کیاگیا یعنی انسان کامل اور وہ یقینا مسلمان ہی ہوتا ہے۔

علاوہ ازیں وہ لوگ جو علم حاصل کرکے لوگوں کو عقائد باطلہ کی ترغیب دیتے ہیں اور یوں ان کو گمراہی کے راستے پر ڈالتے ہیں وہ جس قدر تبلیغ واشاعت کا کام کریں اس بشارت میں شامل نہیں کیوںکہ ان کا علم نفع بخش ہونے کی بجائے ضرر رساں ہوتا ہے۔نیز جو لوگ فوت شدہ مسلمانوں کے لیے دعا کا انکار کرتے ہیں اور ان کے خیال میں یہ بے مقصد بات ہے اور میت کو خود اپنی زندگی میں عمل کرناچاہیے تھااور اس طرح کے حیلے بہانے تلاش کرکے ایصال ثواب سے روگردانی کرتے ہیں وہ قرآن وسنت سے بے خبر ہیں۔ قرآن وسنت کو اپنی خواہشات اور بدعات پر مبنی عقائد سے مقدم رکھنا ہر مسلمان پر لازم ہے۔ جو عقیدہ قرآن وسنت سے متصادم ہو وہ بدعت ہوتا ہے۔ اللہ تعالیٰ ہم سب کو قرآن وسنت کی تعلیمات پر عمل پیرا ہونے کی توفیق عطا فرمائے آمین۔