Shair-e-Mashriq Allama Doctor Iqbal
Da‘wat-o-Tabligh ke muta‘alliq apne ek dost ke sawal ke jawab mein farmate hain:

“Qabool-e-Islam mein asal cheez dil hai.
Jab dil kisi tabdeeli par razamand ho jata hai aur kisi baat par qaraar pakar leta hai,
to phir baqi tamam jism is ke siwa kuchh nahi karta ke
woh is tabdeeli ki ta’eed ke liye waqf ho jaye.”

Hum Islam ke qadeem aur jadeed muballighon mein ek wazeh farq dekhte hain.
Qadeem muballighon ka waar ghair-muslimon ke dilon par hota tha.
Woh apni lillahiat, be-nafsi, khush-akhlaqi aur ehsan-o-murovvat ki jadoo-asar adaon se
dilon ko giraft mein le lete thay,
aur is tarah hazaron log baghair kisi behas-o-takraar ke
khud-ba-khud un ke rang mein rang jate thay.

Magar jadeed muballighon ka sara zor
dimaagh ki tabdeeli par hota hai.
Woh sadaqat-e-Islam par ek daleel dete hain,
muqable mein ghair-muslim doosri hujjat pesh kar deta hai,
phir behas-o-takraar shuru hoti hai —
aur hidayat khatam ho jati hai.

“Muballighin-e-Islam ko dilon ko mutasir karne ke liye nikalna chahiye
ya dimaaghon ko?”
Is faislay ka asaan tareeqa yeh hai ke hum fitrat ki rawish ki pairvi karein.

Ghor karne se maloom hota hai ke fitrat
apni futoohat hasil karne ke liye
hamesha apna ta‘alluq dilon se jorti hai.
Fitrat khane mein lazzat paida karti hai
aur aap use be-ikhtiyar kha jate hain —
us waqt koi bhi shakhs dimaagh se yeh nahi poochta
ke yeh khana tibbi lihaz se mufeed hai ya nahi.

Aap kahin ja rahe hote hain ke
na-gahaan phoolon ki khushnuma zameen
aur lab-e-jo ka haseen manzar saamne aa jata hai,
aap be-ikhtiyar wahin baith jate hain.
Thandi hawa ka ek dil-nawaz jhonka aata hai
aur aap ko meethi neend sula deta hai —
is lamhay bhi koi dimaagh se nahi poochta
ke mujhe sona chahiye ya nahi.

Mukhtasir yeh ke:
Fitrat har kaam mein pehle dilon ko giraft karti hai,
phir apna matlab hasil karti hai.
Woh dimaagh ki taraf kabhi mutawajjah nahi hoti.

Islam chunaanche sar-asar noor-e-fitrat hai,
is liye muballighin ko chahiye ke
akhlaq aur muhabbat ki gehraiyon se
dilon ko is tarah shikaar karein
ke un mein sarkashi aur inkar ki taqat hi baqi na rahe.

Is ke liye zaroori hai ke muballigh-e-Islam
Islami kirdar ki azmat ka malik ho,
taake sarkash se sarkash aadmi bhi
us ke saamne gardan jhuka de.

Baqui rahe dimaaghi mubahis aur aqli takraar,
to is se na dil mutma’in hota hai,
na munqalib hota hai,
aur na hi fitrat raam hoti hai.

“Mera khayal hai ke dil aur dimaagh
ke kaam karne ke tareeqon mein bohat farq hai.”

Dimaagh aksar auqaat
hazaron mazboot dalail ko bhi mustarad kar deta hai
aur un ki parwah nahi karta.
Lekin dil, is ke bar‘aks,
kabhi kabhi kamzor se kamzor cheez se
is qadar mutasir ho jata hai
ke sirf ek jhatkay mein
zindagi ka sara naqsha badal jata hai.

Qabool-e-Islam ka ta‘alluq
jis qadar dil se hai,
utna dimaagh se nahi.

Asal baat jo muballigh ko maloom honi chahiye
yeh hai ke
woh kaun se nashtar hain
jin se dil mutasir hota hai.

Kuffar-o-Mushrikeen ke inqilab-e-hayat ki
hazaron misaalen tareekh-e-Islam mein mojood hain.
Hum dekhte hain ke ek shakhs
apne halaat ke tehat
kisi khayal ya mazhab par chattaan ki tarah qaim hota hai —
na-gahaan ghaib se us ke dil par ek nashtar chalta hai
aur chashm-e-zadan mein
us ki zindagi ki poori guzishta tareekh badal jati hai.

Sadaqat-e-Islam ke aqli dalail aap ke paas bohat hain,
magar qalbi dalail kam hain.
Agar aap nau-Muslimon ke paas jayein,
to woh batayenge ke Islam ki
kaun si be-saakhta ada
un ke dil ko bha gayi.

Agar in bayanat ko
ek kitaab mein jama kar diya jaye,
to mujhe yaqeen hai ke
inqilabat ki ek bilkul nayi duniya
muballighon ke saamne aa jayegi,
aur isha‘at-e-Islam ke liye
aise jadeed dilail aur naye hathyaar mil jayenge
jin se Islam ka maujooda kutub-khana khaali hai.

Hawala:
Da‘wat‑e‑Islam: Aqwaam‑e‑Aalam aur Baradaran‑e‑Watan ke Darmiyan
Musannifah: Professor Mohsin Usmani

“Dil jeet liya jaye to zindagi jeet li jati hai;
dimaagh jeet kar sirf behas.”