شادی کے بعد ہر جوڑے کی یہی تمنا ہوتی ہے کہ جلد اس کی گود ہری ہو۔ دیر ہوتی ہے تو سو جتن کرتا ہے، روتا گڑ گڑاتا ہے، دعائیں مانگتا ہے اور نہ جانے کیسا کیسا کرتا ہے، خدا خدا کرکے نخل آرزو بار آور ہوتی ہے، دل کی کلی کھلتی ہے، اللہ اس کی گود بھردیتا ہے اور مسرت کا سامان کرتا ہے۔ بچہ بلا شبہ اپنے ساتھ بے شمار مسرتیں لاتا ہے اس کے ساتھ گھر میں برکت کا نزول ہوتا ہے، والدین کے لیے اس سے بڑھ کر کوئی مسرت نہیں ہوتی۔ ماں دن کا سکھ اور رات کا چین قربان کرکے بھی خوش رہتی ہے، صورت دیکھتے ہی باپ کی ساری الجھنیں کافور ہوجاتی ہے، سنجیدہ سے سنجیدہ آدمی بھی بچوں کی معصوم حرکتیں دیکھ کر بھی بے ساختہ مسکرادیتا ہے، غرض ہر طرف مسرت وفرحت وانبساط کا ایک لہر دوڑتی ہے۔

نیک اولاد اللہ تعالیٰ کی نعمتوں میں سے ایک نعمت ہے، جسے اللہ تعالیٰ نے آنکھوں کی ٹھنڈک کہا ہے اس لیے اولاد کا ہونا خوش بختی تصور کیا جاتا ہے، جنہیں یہ نعمت میسر آتی ہے وہ بہت خوش وخرم رہتے ہیں اور جن کے ہاں اولاد نہیں ہوتی وہ ہمیشہ اولاد کی محرومیت کے صدمے میں پڑے رہتے ہیں۔

مگر جب اولاد مل جاتی ہے گویا کہ دنیا کی ہر نعمت مل گئی ظاہر ہے ایسا بیش بہا تحفہ اور ایسی نعمت غیر مترقبہ پاکر کون بد نصیب مسرورنہ ہوگا۔ مگر مسرتوں کے ساتھ بچہ بے شمار ذمہ داریاں بھی لاتا ہے۔

(۱) خوش دلی سے اس کو پالنا پوسنا۔

(۲) شفقت ومحبت کا برتاؤ کرنا۔

(۳) ہمدردی ودلسوزی سے سکھانا پڑھانا۔

(۴) تدریج سے پسندیدہ عادات ڈلوانا۔

(۵) مختلف مواقع کے آداب بتانا۔

(۶) مہذب طور طریقے سکھانا۔

(۷) عقائد کو نکھارنا، اعمال کو سدھارنا اور اخلاق کو سنوارنا۔

یہ سب وہ اہم ذمے داریاں ہیں جو بچے کے ضمن میں والدین پر عائد ہوتی ہیں۔

انہی اولاد کے تعلق سے اللہ تعالیٰ قرآن مجید میں ارشاد فرماتا ہے:

یٰآ اَیُّہَا الَّذِیْنَ آمَنُوْا قُوْا اَنْفُسَکُمْ وَاَہْلِیْکَمْ نَارًا وَّقُوْدُہَا النَّاسُ وَالْحِجَارَۃُ(پارہ ۲۸سورہ تحریم )

ترجمہ: اے ایمان والو تم اپنے آپ کو اور اپنے اہل وعیال کو آگ سے بچاؤ جس کے ایندھن انسان اور پتھر ہوں گے۔

اس آیت کریمہ میں یہی تاکید کی گئی ہے کہ اپنے اہل وعیال کو آگ سے بچاؤ یعنی اپنی اولاد کی تربیت ایسی اخلاقی اور دینی بنیادوں پر کرو تاکہ برائیوں سے بچ جائیں اور نیکیوں کی طرف مائل ہوجائے۔ اس طرح وہ آخرت میں دوزخ کی آگ سے نجات حاصل کرلے۔

اس سے معلوم ہواکہ اولاد کی تربیت عمدہ طریقے سے کرنا ماں وباپ کی ذمہ داریاں ہے، اور نیک اولاد والدین کی زندگی کا بڑا قیمتی سرمایہ ہے۔ جہاں اللہ تعالیٰ نے اولاد پر والدین کی خدمت کا فرض عائد کیا ہے، وہیں پر کچھ حقوق بھی والدین کے ذمے لگائے ہیں۔ تاکہ فطری تقاضے قائم رہیں اور کسی فریق کی حق تلفی نہ ہو، اولاد کی صالح خطوط پر پرورش کے ساتھ انہیں دینی تعلیم سے آراستہ کرنا بھی والدین کا فرض ہے، اس کے متعلق ارشاد نبوی یہ ہے کہ:

طلب العلم فریضۃ علیٰ کل مسلم ومسلمۃ۔

علم حاصل کرنا ہر مسلمان پر فرض ہے۔

 اس کے متعلق ارشاد نبوی اور مزید ملاحظہ ہو:

حضر ت ایوب بن موسیٰ رضی اللہ عنہ بواسطہ اپنے والد واپنے دادا سے روایت کرتے ہیں کہ نبی کریم صلی اللہ علیہ وسلم نے ارشاد فرمایا اچھی تعلیم وتربیت سے زیادہ ایک باپ کا اپنی اولاد کے لیے کوئی عطیہ نہیں۔ اس حدیث شریف سے معلوم ہواکہ علم وہ دولت ہے کہ جس سے انسان کی صلاحیتیں اجاگر ہوتی ہیں۔ (ترمذی شریف)

لہٰذا والدین پر فرض ہے کہ خود بھی علم حاصل کریں اور اپنی اولاد کو بھی دولت علم سے آراستہ کریں۔ والدہ کی گود بچے کی پہلی اور بہترین درسگاہ ہے،جہاں انسان کی سیرت سنورتی ہے، کیوں کہ بچے کا سب سے زیادہ رابطہ ماں کے ساتھ ہوتا ہے اور وہ ماں سے اس کے ماحول کا اثر قبول کرتا ہے۔

لہٰذا والدہ کو بچے کی ابتدائی تعلیم کی طرف خصوصی توجہ دینا چاہیے۔ یہی وجہ ہے کہ اسلام میں علم کو بڑی اہمیت دی گئی ہے تعلیم کی قدر وقیمت نبی اکرم صلی اللہ علیہ وسلم کے اس عمل سے ظاہر ہے کہ قیدیوں کا فدیہ مقرر کرتے ہوئے فرمایا کہ جو قیدی پڑھے لکھے ہیں اور فدیہ دینے پر قادر نہیں ہیں وہ مسلمانوں کے بچوں کو لکھنا پڑھنا سکھادیں، تو انہیں آزاد کردیا جائے گا، ہم یہ نہیں کہتے ہیں کہ دنیاوی علم نہ سکھاؤ بلکہ سکھاؤ لیکن دنیاوی علوم پر ہی اکتفا نہ کرو بلکہ پہلے دینی علوم سے بچوں کو آراستہ وپیراستہ کرنا ضروری ہے اور انہیں گناہوں سے کوسوں دور رہنے کی تلقین کرو اور اعمال حسنہ کی ترغیب دلاؤ۔ تاکہ بچے کے ذہن میں بچپن سے ہی شریعت کی پیروی کا جذبہ پیدا ہو، دینی امور ومسائل، رہنے سہنے، کھانے پینے، بات چیت کے آداب، بڑوں کا ادب واحترام، حرام کاریوں سے اجتناب، نیکیوں کو اختیار کرنے کا جذبہ پیدا ہو۔

کیوں کہ بچے اور بچیوں کی تربیت دینی ماحول میں نہ ہوئی ، آوارگی، بد کرداری، چوری، جوابازی، شراب نوشی، زنا کاری کا عادی بن گیا تو یہ ایسے جرم وگناہ ہیں جو آدمی کو دوزخ میں لے جانے والے ہیں وہ تو دوزخ میں جائیں گے، لیکن والدین بھی ماخوذ ہوں گے کہ انہوں نے اچھی تربیت کیوںنہ کی، ان کے بگڑتے ہوئے کردار کو سنوارا کیوں نہیں؟ گناہوں میں پھنسے ہوئے دیکھ کر روکا کیوں نہیں؟ اگر بچپن میں غلطیوں پر تنبیہ کی جاتی تو یہ صورت حال پیدا نہ ہوتی۔

آج کل مسلم معاشرے کا برا ہے قوم مسلم کے نا عاقبت اندیش افراد اپنے بچوں کو کلمہ سکھانے کے بجائے گانا سکھاتے ہیں، نماز کی تعلیم دینے کے بجائے ناچنے اور ایکٹنگ کا طریقہ بتاتے ہیں، ان کے ناچنے اور گانے پر اتنا خوش ہوتے ہیں، جتنا کلمہ وسلام پر خوش نہیں ہوتے ہیں۔ لیجئے اس حکایت کو پڑھیے اور بچوں کی صحیح تربیت کے بارے میں غورکیجئے۔

حضرت سیدنا مالک بن دینار رحمۃ اللہ علیہ فرماتے ہیں منقول ہے کہ بنی اسرائیل میں ایک عالم صاحب لوگوں کو گھر میں جمع کرکے بیان سنایا کرتے تھے،اس عالم صاحب کا ایک لڑکا تھا ایک دن اس نے خوبصورت لڑکی کی طرف اشارہ کیا تو عالم صاحب نے دیکھ لیا اور کہا اے بیٹے! صبر کر، یہ کہتے کہتے ہی عالم صاحب اپنے تخت سے فوراً منہ کے بل گرپڑے، یہاں تک کہ ان کے بعض جوڑ بھی ٹوٹ گئے۔ اللہ عزوجل نے اس وقت کے نبی علیہ السلام کو وحی فرمائی کہ فلاں عالم کو خبر کردو کہ اس کی نسل سے کبھی صدیق پیدا نہیں کروں گا ۔ میرے لیے صرف اتنا ہی ناراض ہونا تھا کہ وہ بیٹے کو کہہ دے، بیٹے صبر کرو۔ مطلب یہ ہے کہ اپنے بیٹے پر سختی کیوں نہیں کی اور اس کو اس بری حرکت سے اچھی طرح باز کیوں نہ رکھا، اپنی اولاد کی تربیت نہ کرنے پر ان کو گناہوں سے نہ بچانے کی صورت میں اس پر اللہ تعالیٰ کا قہر وغضب نازل ہوا۔

قیامت کے دن مرد اللہ تعالیٰ کی بارگاہ میں کھڑا کیا جائے گا اس کی بیوی اور اولاد اللہ تعالیٰ کی جناب میں شکایت کرتے ہوئے عرض کریں گے، اے ہمارے رب عزوجل! اس مرد کو ہمارے حق کے بارے میں مواخذہ کر۔ کیوں کہ اس نے ہمارے دین کی باتیں نہ سکھائیں اور حرام روزی کھلاتا تھا، اور ہم بے علم تھے۔

لہٰذا اس بد نصیب کو حرام روزی کمانے کے سبب پیٹا جائے گا اور فرشتے پہاڑ کے برابر مرد کی نیکیاں لائیں گے تو اولاد میں ایک شخص بڑھے گا اور کہے گا میرا وزن کم ہے اوراس کی نیکیوں میں سے لے گا۔ پھر دوسرا آئے گا وہ بھی اس کی نیکیوں سے اپنی کمی پوری کرے گا ۔ یہاں تک کہ اس کی تمام نیکیاں ختم ہوجائیں گے۔ پھر اپنے گھر والوں کی طرف رخ کرکے کہے گا آہ! میری گردن پر اب وہ گناہ ر ہ گئے ہیں جو تمہارے لیے میں نے اٹھائے اور فرشتے کہیں گے، یہ وہ بد نصیب ہے جس کے گھر والے اس کی تمام نیکیاں لے گئے اور یہ ان کی وجہ سے دوزخ کا مستحق ہوچکا ہے۔

لہٰذا خود بھی جہنم کی آگ سے بچیں اور اپنی اولاد کو بھی اس آگ سے بچائیں، اسی میں ہمارے لیے دنیا وآخرت میں کامیابی ہے اور جو فرائض بچوں کے تعلق سے شریعت مطہرہ نے ہم پر عائد کیا ہے، اس کو پورا کریں گے، اگر ہم نے ان فرائض کو پورا نہ کیا تو میدان حشر میں افسوس کے سوا کچھ بھی نہیں ہوگا۔

{۔۔۔۔۔}