حضورتاجدارختم نبوتﷺ کی محبت وشفقت جو امت مر حومہ کے ساتھ ہے وہ محتاج بیان نہیں ہے اور پھر یہ بھی مسلم ہے کہ زمانہ ماضی ومستقبل کے جتنے علوم وحالات آپﷺکو عطا کیے گئے وہ نہ کسی نبی کو حاصل ہیں اور نہ کسی فرشتہ کو ۔ ان دونوں باتوں کو سمجھنے کے بعد یہ یقین کرنا پڑتا ہے کہ آپﷺنے اپنی امت کے لیے دین کے راستہ کو ایسا ہموار اور صاف بنا کر چھوڑا کہ جس میں دن اوررات برابر ہوں، اس پر چلنے والے کو ٹھوکر لگنے یا راستہ بھولنے کا اندیشہ نہ رہے، اس میں جتنے خطرات کے مواقع ہوںگے، وہ سب آپﷺنے ان کو بتلادیئے،نیز اس راستہ کے ایسے ایسے نشانات ان کو بتلادیے جو تمام راستہ میں ان کی رہبری کرتے رہیں ۔ چنانچہ جب ہم حدیث نبویﷺکی کتب پر نظر ڈالتے ہیں تو ثابت ہوجاتا ہے ،کہ آپﷺنے ان امور میں کوئی دقیقہ نہیں اٹھا رکھا ،آپﷺکے بعد جتنے قابل اقتدا ء رہنما پیدا ہونے والے تھے، آپﷺ نے اکثر کے نام لے لے کر بتلادئیے ،اور امت کو ان کی پیروی کی ہدایت فرمائی ،حضورتاجدارختم نبوتﷺ کی انتہائی شفقت ومربیانہ تعلیم اور پھر احادیث درج ذیل کو دیکھتے ہوئے ایک مسلمان بلکہ ایک منصف مزاج انسان یہ یقین کیے بغیر نہیں رہ سکتا کہ آپﷺکے بعد کوئی کسی قسم کا نبی (اگرچہ وہ بقول مرزا ظلی یا بروزی رنگ میں سہی)اس عالم میں پیدا نہیں ہوسکتا ورنہ لازم تھا کہ آپﷺان سب سے پہلے اور سب سے زیادہ اس نبی کا ذکر فرماتے۔ مگر عجب تماشہ ہے کہ حضورتاجدارختم نبوتﷺاپنی امت کو خلفائے راشدین رضی اللہ عنہم کی اقتداء کا حکم فرماتے ہیں ،ائمہ دین اور امراء کی اطاعت کی تعلیم دیتے ہیںبلکہ ایک حبشی غلام کی بھی (جب کہ وہ امیر بن جائے )اطاعت امت پر واجب قرار دیتے ہیں ، حضرت عبد اللہ بن مسعودرضی اللہ عنہ اور عمار بن یاسررضی اللہ عنہ کی اقتداء کی دعوت دیتے ہیں ، حضرت سیدنا زبیررضی اللہ عنہ،حضرت سیدنا ابو عبیدۃ بن الجراح،حضرت سیدنا معاذ بن جبل رضی اللہ عنہ ،حضرت سیدناعبداللہ بن عباس رضی اللہ عنہماوغیرہ صحابہ کرام رضی اللہ عنہم کے نام لے لے کر انہیں واجب التکریم اور قابل اقتداء فرماتے ہیں، حضرت سیدنااویس قرنی رضی اللہ عنہ کے آنے کی خبر اور ان سے استغفار کرانے کی تعلیم دیتے ہیں، مجددینِ امت کا ہر صدی پر آنا، ابدال کا ملک شام میں پیدا ہونا، اور اُن کا مستجاب الدعوات ہونا وغیرہ وغیرہ مفصل بیان فرماتے ہیں۔ لیکن ایک حدیث میں بھی یہ بیان نہیں فرماتے کہ ہمارے بعد فلاں نبی پیدا ہوگا، تم اس پر ایمان لانا اور اس کی اطاعت کرنا۔ اگر پہلو میں دل اور دل میں ایمان یا انصاف کا کوئی ذرہ بھی ہے تو تمام احادیثِ کو چھوڑ کر صرف یہی احادیث ایک انسان کو اس پر مجبور کرنے کے لیے کافی ہیں کہ آپﷺکے بعد تا قیامت کسی قسم کا کوئی نبی پیدا نہیں ہوگا۔ پہلی حدیث عَنْ أَبِی ہُرَیْرَۃَ رَضِیَ اللَّہُ عَنْہُ أَنَّ رَسُولَ اللَّہِ صَلَّی اللَّہُ عَلَیْہِ وَسَلَّمَ قَالَ إِنَّ مَثَلِی وَمَثَلَ الْأَنْبِیَاء ِ مِنْ قَبْلِی کَمَثَلِ رَجُلٍ بَنَی بَیْتًا فَأَحْسَنَہُ وَأَجْمَلَہُ إِلَّا مَوْضِعَ لَبِنَۃٍ مِنْ زَاوِیَۃٍ فَجَعَلَ النَّاسُ یَطُوفُونَ بِہِ وَیَعْجَبُونَ لَہُ وَیَقُولُونَ ہَلَّا وُضِعَتْ ہَذِہِ اللَّبِنَۃُ قَالَ فَأَنَا اللَّبِنَۃُ وَأَنَا خَاتِمُ النَّبِیِّینَ۔ ترجمہ :حضرت سیدنا ابو ہریرہ رضی اللہ تعالیٰ عنہ سے روایت ہے کہ حضورتاجدارختم نبوتﷺنے فرمایا:میری مثال اور مجھ سے پہلے انبیاء کرام علیہم السلام کی مثال اس شخص جیسی ہے جس نے ایک مکان بنایا اور اسے بہت خوبصورت تیار کیا مگرایک کونے میں اینٹ کی جگہ چھوڑدی۔ اب لوگ آکر اس کے ارد گرد گھومتے ہیں اور اسے دیکھ کر خوش ہوتے ہیں اور یہ بھی کہتے ہیں کہ ایک اینٹ کیوں نہیں رکھی گئی۔ آپ ﷺنے فرمایا کہ میں وہی اینٹ ہوں اور میں خاتم النبیین ہوں۔ (صحیح البخاری:محمد بن إسماعیل أبو عبداللہ البخاری الجعفی(۴:۱۸۶) دوسری حدیث حَدَّثَنَا مُحَمَّدُ بْنُ جَعْفَرٍ حَدَّثَنَا شُعْبَۃُ عَنْ فُرَاتٍ الْقَزَّازِ قَالَ سَمِعْتُ أَبَا حَازِمٍ قَالَ قَاعَدْتُ أَبَا ہُرَیْرَۃَ خَمْسَ سِنِینَ فَسَمِعْتُہُ یُحَدِّثُ عَنْ النَّبِیِّ صَلَّی اللَّہُ عَلَیْہِ وَسَلَّمَ قَالَ کَانَتْ بَنُو إِسْرَائِیلَ تَسُوسُہُمْ الْأَنْبِیَاء ُ کُلَّمَا ہَلَکَ نَبِیٌّ خَلَفَہُ نَبِیٌّ وَإِنَّہُ لَا نَبِیَّ بَعْدِی وَسَیَکُونُ خُلَفَاء ُ فَیَکْثُرُونَ قَالُوا فَمَا تَأْمُرُنَا قَالَ فُوا بِبَیْعَۃِ الْأَوَّلِ فَالْأَوَّلِ أَعْطُوہُمْ حَقَّہُمْ فَإِنَّ اللَّہَ سَائِلُہُمْ عَمَّا اسْتَرْعَاہُمْ۔ ترجمہ :حضرت سیدنا ابو حازم سلمان اشجعی رضی اللہ عنہ بیان کرتے ہیں۔ میں پانچ سال حضرت سیدناابو ہریرہ رضی اللہ تعالیٰ عنہ کی مجلس میں بیٹھا ہوں، میں نے انھیں حضورتاجدارختم نبوتﷺکی یہ حدیث بیان کرتے ہوئے سنا:کہ آپﷺ نے فرمایا:بنی اسرائیل کی حکومت حضرات انبیاء کرام علیہم السلام چلاتے اور ان کے امور کا انتظام کرتے تھے۔ جب ایک نبی کی وفات ہو جاتی تو ان کا جانشین دوسرا نبی ہو جا تا تھا لیکن میرے بعد کوئی نبی تو نہیں ہو گا، البتہ خلفاء ہوں گے اور وہ بھی بکثرت ہوں گے۔ صحابہ کرام رضوان اللہ عنھم اجمعین نے عرض کیا: پھر آپﷺ ہمیں کیا حکم دیتے ہیں؟آپ ﷺنے فرمایا:جب کوئی خلیفہ ہو جائے۔ (اور تم نے اس سے بیعت کر لی ہو)تو اس سے کی ہوئی بیعت پوری کرو۔ پھر اس کے بعد جو پہلے ہو اس کی بیعت پوری کرو۔ انھیں ان کا حق دو۔ اگر وہ ظلم کریں گے تو اللہ ان سے پوچھے گا کہ انھوں نے اپنی رعایا کا حق کیسے ادا کیا؟۔ (صحیح البخاری:محمد بن إسماعیل أبو عبداللہ البخاری الجعفی(۴:۱۶۹) تیسری حدیث عَنْ الزُّہْرِیِّ قَالَ أَخْبَرَنِی مُحَمَّدُ بْنُ جُبَیْرِ بْنِ مُطْعِمٍ عَنْ أَبِیہِ رَضِیَ اللَّہُ عَنْہُ قَالَ سَمِعْتُ رَسُولَ اللَّہِ صَلَّی اللَّہُ عَلَیْہِ وَسَلَّمَ یَقُولُ إِنَّ لِی أَسْمَاء ً أَنَا مُحَمَّدٌ وَأَنَا أَحْمَدُ وَأَنَا الْمَاحِی الَّذِی یَمْحُو اللَّہُ بِیَ الْکُفْرَ وَأَنَا الْحَاشِرُ الَّذِی یُحْشَرُ النَّاسُ عَلَی قَدَمِی وَأَنَا الْعَاقِبُ۔ ترجمہ :حضرت سیدنا جبیر بن مطعم رضی اللہ عنہ سے روایت ہے، انہوں نے فرمایاکہ میں نے حضورتاجدارختم نبوتﷺکو یہ فرماتے ہوئے سنا:بلاشبہ میرے کئی ایک نام ہیں:میں محمد ہوں، میں احمد ہوں، میں ماحی ہوں۔ میری وجہ سے اللہ تعالٰی کفر کو مٹائے گا۔ میں حاشر ہوں، سب لوگ میرے قدموں پر جمع کیے جائیں گے اور میں عاقب ہوں۔ (صحیح البخاری:محمد بن إسماعیل أبو عبداللہ البخاری الجعفی(۴:۱۸۵) چوتھی حدیث عَنْ عَامِرِ بْنِ سَعْدِ بْنِ أَبِی وَقَّاصٍ، عَنْ أَبِیہِ، قَالَ:قَالَ رَسُولُ اللہِ صَلَّی اللہُ عَلَیْہِ وَسَلَّمَ لِعَلِیٍّ: أَنْتَ مِنِّی بِمَنْزِلَۃِ ہَارُونَ مِنْ مُوسَی، إِلَّا أَنَّہُ لَا نَبِیَّ بَعْدِی قَالَ سَعِیدٌ: فَأَحْبَبْتُ أَنْ أُشَافِہَ بِہَا سَعْدًا، فَلَقِیتُ سَعْدًا فَحَدَّثْتُہُ بِمَا حَدَّثَنِی عَامِرٌ، فَقَالَ:أَنَا سَمِعْتُہُ، فَقُلْتُ آنْتَ سَمِعْتَہُ؟ فَوَضَعَ إِصْبَعَیْہِ عَلَی أُذُنَیْہِ فَقَالَ:نَعَمْ، وَإِلَّا، فَاسْتَکَّتَا۔ ترجمہ :حضرت سیدناسعید بن مسیب رضی اللہ عنہ نے حضرت سیدنا عامر بن سعد بن ابی وقاص رضی اللہ عنہ سے،انھوں نے ا پنے والد سے روایت کی کہ انہوںنے فرمایاکہ حضورتاجدارختم نبوتﷺنے حضرت سیدنا علی رضی اللہ تعالیٰ عنہ سے فرمایا:تمھارا میرے ساتھ وہی مقام ہے جوحضرت سیدنا ہارون علیہ السلام کاحضرت سیدناموسیٰ علیہ السلام کیساتھ تھا مگر یہ کہ میرے بعد کوئی نبی نہیں۔حضرت سیدناسعیدبن مسیب رضی اللہ عنہ نے کہا:میں نے چاہا کہ یہ بات میں خود حضرت سیدنا سعد رضی اللہ تعالیٰ عنہ کے منہ سے سنوں تو میں حضرت سیدنا سعد رضی اللہ تعالیٰ عنہ سے جا کر ملا اور جو حدیث مجھے حضرت سیدناعامررضی اللہ عنہ نے سنائی تھی،ان کے سامنے بیان کی،انھوں نے کہا:میں نے(آپ ﷺسے خود)یہ بات سنی تھی،میں نے کہا:آپ نے خود سنی تھی؟تو انھوں نے اپنی انگلیاں اپنے دونوں کانوں پر رکھیں اورکہا:ہاں،ورنہ(اگر یہ بات نہ سنی ہو)تو ان دونوں کو سنائی نہ دے۔ (صحیح مسلم : مسلم بن الحجاج أبو الحسن القشیری النیسابوری (۴:۱۸۷۰)