ہنسی مذاق کیجیے مگردل نہ دکھائیے 

(اُسوۂ رسول کی روشنی میں رہنمااصول)

مشتاق احمد قادری

ایک حد تک ہنسنا اور ہنسانا، خوش ہونا اور خوش کرنااور تفریح ومزاح انسانی فطرتِ سلیمہ کا تقاضا ہے۔ جس کی زندگی میں اس کے لیے وقت نہیں ہوتا وہ صحیح معنیٰ میں زندگی سے لطف اندوز نہیں ہوسکتا اور اس متاعِ فانی سے کما حقہ متمتع نہیں ہوسکتا۔ اس کی زندگی اس کے لیے اجیرن اور بوجھ بن جاتی ہے، اداسی وپژمردگی اس پر چھا جاتی ہے کیوں کہ زندگی زندہ دلی کا نام ہے اور اس کی تابندگی ورونق، دل کشی ورعنائی ہنسی وخوش طبعی سے قائم ہے اسی وجہ سے لوگ ایسے مواقع کی تلاش میں رہتے ہیں جہاں وہ زندگی کے مسائل ا ورالجھنوں سے فارغ ہوکر جی بھر کر خوب ہنسیں اور اس حقیقی دنیا اور اس کے جھمیلوں سے نکل کر ایک تصوراتی دنیا میں کھوجائیں جس میں کیف وسرور پایا جاتا ہو اور ان اشخاص سے زیاد ہ مانوس اور قریب ہوتے ہیں جن کے پاس ہوتے ہوئے وہ اپنے غم وپریشانی کو بھول کر سکون وراحت محسوس کریں۔ یہی سبب ہے کہ موجودہ دور میں مادیت کا مارا، تناؤ اور ٹینشن کا شکار، ذہنی الجھنوں اور پریشانیوں میں جکڑا، خوشی ومسرت کے لیے در در کی ٹھوکریں کھاتا، چین وسکون کا متلاشی انسان کا میڈی شو، لوفر پروگراموں اور فلموں کو اپنی پریشانیوں کا حل، دکھوں کی دوا اور زندگی میں رونق ومسرت کے حصول کا منبع وذریعہ سمجھ رہا ہے اور اپنے قیمتی اوقات اور کمائی کا کچھ نہ کچھ حصہ اس کی نذر کررہا ہے۔ ان پروگراموں اور فلموں کی بڑھتی کثرت ومقبولیت اس کی واضح دلیل ہے۔

اسی فطرت انسانی کی وجہ سے اسلام نے خوش مزاجی وخوش طبعی کو ناپسند نہیں کیا بلکہ اس کو پسندیدگی کی نگاہ سے دیکھا ہے اور خود حضور کی حیاتِ طیبہ میں ہمیں نظر آتا ہے کہ آپ اپنے ساتھیوں کے ساتھ ہنسی ومزاح فرمارہے ہیں، خود مسکرارہے ہیں اور دوسروں کو ہنسا رہے ہیں۔ حضرت انس فرماتے ہیں کہ اللہ کے رسول ہمارے ساتھ خوش طبعی کیا کرتے تھے میرے چھوٹے بھوئی جس نے گوریا پالی تھی وہ مرگئی تھی آپ اس سے از راہ مزاح کہا کرتے تھے: یَا اَبَا عُمَیْرْ مَافَعَلَ النُغَیْرْ اے ابوعمیر! تمہاری گوریا کیا ہوئی؟ خود حضرت انس کو کبھی کبھار یَا ذَا الاُذْنَیْنِ’’دو کان والے‘‘ کہا کرتے تھے۔ ایک مرتبہ ایک صحابی حضور صلی اللہ علیہ وسلم کے پاس آئے اور انہوں نے عرض کیا کہ اے اللہ کے رسول! مجھے سواری کے لیے جانور دیجیے؟ تو آپ نے فرمایا میں تم کو اونٹنی کا بچہ دوں گا۔ صحابی نے عرض کیا کہ میں اونٹنی کا بچہ لے کر کیا کروں گا؟ تو آپ نے فرمایا کہ ہر اونٹ کسی اونٹنی کا بچہ ہی تو ہوتا ہے۔ (بخاری؍ ۷۶۸)

ایک مرتبہ ایک بڑھیا آپ کی خدمت میں آئی اور پوچھا کہ اے اللہ کے رسول !کیا میں جنت میں جاؤں گی؟ تو آپ نے فرمایا کہ بڑھیا جنت میں نہیں جائے گی۔ بڑھیا پریشان ہوگئی اور افسوس کرنے لگی تو آپ نے فرمایا کہ ہر بڑھیا کو اس کی جوانی لو ٹائی جائے گی وہ جوان ہوکر جنت میں جائے گی نہ کہ بڑھاپے کے ساتھ۔ ایک دیہاتی صحابی تھے جن کا نا م زہیر تھا وہ دیہات سے سوداسلف لاکر بیچتے تھے۔ ایک مرتبہ وہ اپنا سامان بیچ رہے تھے تو نبیِ کریم صلی اللہ علیہ وسلم نے پیچھے سے آکر ان کو اس طرح پکڑ لیا کہ ان کو معلوم نہ ہوسکا کہ کس نے ان کو پکڑا ہے تو وہ چلانے لگے کہ اے! کون ہے؟ مجھے چھوڑ دو، جب ان کو معلوم ہوا کہ پکڑنے والے آپ ہیں تو اپنے بدن کو آپ سے اور چمٹانے لگے۔ نبیِ کریم صلی اللہ تعالیٰ علیہ وسلم نے از راہِ مزاح ان کی بولی لگانی شروع کردی کہ اس غلام کو کون خریدے گا؟ تو ان صحابی نے کہا کہ یہ تو سستا سودا ہے آپ نے فرمایا لیکن اللہ کے نزدیک تم بہت قیمتی ہو۔ (احمد؍ ۱۲۱۸۷)

آپ کے مزاح کے ان واقعات کو دیکھنے سے یہ بات کھل کر سامنے آتی ہے کہ آپ کسی کا ٹھٹھا اور تمسخر نہیں کررہے ہیں جس سے اللہ تعالیٰ نے منع کیا ہے (کوئی قوم کسی قوم کا مذاق اور ٹھٹھا نہ کرے) آپ مزاح اور خوش کرنے کے لیے جھوٹ اور غلط بیانی سے کام نہیں لے رہے ہیں بلکہ حقیقت کو ہی کنایہ میںبیان کررہے ہیں جس سے ہنسی اور مزاح کا ماحول پیدا ہورہا ہے اور سچ کے دامن کو ہاتھ سے جانے نہیں دے رہے ہیں۔ ایک مرتبہ حضرت ابوہریرہ رضی اللہ تعالیٰ عنہ نے آپ سے پوچھا کہ اے اللہ کے رسول!( صلی اللہ علیہ وسلم) آپ تو ہم سے ہنسی مذاق بھی کیا کرتے ہیں؟ پوچھنے کا مطلب یہ تھا کہ آپ تو کبھی کبھار ہم سے مذاق بھی کیا کرتے ہیں کیا وہ بھی ہمارے لیے قابل تقلید ہے؟ تو آپ نے فرمایا کہ میں اس وقت بھی سچ ہی بولتا ہوں۔ (ترمذی؍ ۱۹۱۶) 

۔حضوراکرم صلی اللہ علیہ وسلم نے مذاق میں بھی کسی کو تکلیف پہنچانے کو قبیح وشنیع قرار دیا ہے چنانچہ آپ نے فرمایا کہ کوئی شخص اپنے بھائی کا ساما ن نہ مذاق میں لے اور نہ ہی سنجیدگی میں لے۔ (ابوداؤد؍ ۴۳۵۰) ایک مرتبہ چند صحابہ نبیِ کریم صلی اللہ علیہ وسلم کے ساتھ جارہے تھے تو ان میں ایک صحابی سو گئے تو کچھ صحابہ رسی لائے اور ان کو باندھ دیا تو وہ صحابی گھبراگئے۔ا س وقت حضور اکرم صلی اللہ تعالیٰ علیہ وسلم نے فرمایا کہ کسی مسلمان کے لیے جائز نہیں ہے کہ اپنے مسلمان بھائی کو ڈرائے۔ مزاح اور کسی کو ہنسانے کے لیے کسی کی ایسی نقل کرنے سے بھی منع کیا ہے جس سے دیکھنے والے کو برا لگے اور جو کسی کی ایذا رسانی کا باعث بنے۔

 ایک مرتبہ حضرت عائشہ نے حضورصلی اللہ علیہ وسلم کے سامنے حضرت صفیہ کی یہ بتانے کے لیے کہ وہ بہت پست قد ہیں، نقل اتاری تو حضور اکرم صلی اللہ علیہ وسلم نے فرمایا کہ تم نے ایسا کام کیا ہے اگر اس کی کڑواہٹ کو سمندر میں ملایا جائے تو وہ بھی کڑوا ہوجائے۔

اس کے برعکس اگر آج کے کامیڈی شوز، ہنسی ومزاح کی محفلوں کا جائزہ لیں تو ہمیں معلوم ہوتا ہے کہ یہ محفلیں جھوٹ وفریب، استہزا وتمسخر، غلط بیانی ونقالی سے بھری ہوئی ہوتی ہیں اور تھوڑی دیر چند لوگوں کو خوش کرنے کے لیے کسی کی عزت کو نیلام کردیا جاتا ہے تو کسی کو رسوا وذلیل کیا جاتا ہے اور کسی کی ایسی نقل کی جاتی ہے کہ دیکھنے والے کو ناپسند وقبیح لگتا ہے، جس کی وجہ سے یہ محفلیں خوشی کا ذریعہ بننے کے بجائے بغض وعداوت کا ذریعہ بنتی چلی جارہی ہیں۔ سکون روح کا سبب بننے کے بجائے سوہانِ روح ثابت ہورہی ہیں اور یہ وقتی لذت وخوشی دیرینہ بغض وعداوت کا سبب بن رہی ہے۔ ستم ظرفی یہ ہے کہ اس طرح ہنسانے والے کی خوب ہمت افزائی کی جارہی ہے اور اس کے لیے بڑے بڑے پروگرام منعقد کیے جارہے ہیں جس کی وجہ سے یہ مذاق اور طریقہ جنگل کی آگ کی طرح پھیلتا جارہا ہے اور کیا مسلم، کیا غیر مسلم سب اس کو فیشن کے طور پر اپنا رہے ہیں اور اس کو آرٹ اور فن سے تعبیر کررہے ہیں حالاں کہ یہ انسانیت ومعاشرے کو ایسے عمیق دلدل میں دھنسارہا ہے جس سے نکلنا مشکل نظر آرہا ہے۔ یہ ایک ایسا میٹھا زہر ہے (slow Poison) جو معاشرے کی جڑوں اور طاقت کو اندر سے کھوکھلا کررہا ہے اور غیر شعوری طورپر انسانیت کے اعلیٰ دماغوں اور صلاحیتوں کو ملک وقوم کی ترقی وفلاح وبہبود کے لیے استعمال کرنے کے بجائے ان سطحی اور وقتی چیزوں پر لگارہا ہے اور عزت وحرمت اور عظمت ورفعت نام کی چیزوں کی وقعت غیر شعوری طور پر ختم ہورہی ہے جس کی وجہ سے یہ دنیا جنگل اور انسانیت درندہ بنتی چلی جارہی ہے جس میں چھوٹے اور بڑے کی تمیز کی جارہی ہے اور نہ ہی اعلیٰ اور ادنیٰ کا پاس ولحاظ رکھا جارہا ہے اور ہنسی کے نام پر بے حیائی وفحاشی، ناشائستہ حرکتوں اور دوسروں کی ایذا رسانی بلکہ ہر چیز کو روا رکھا جارہا ہے۔ ان محفلوں میں کی جانے والی غلط باتوں اور حرکتوں کو غلط کہنا تو درکنار غلط سمجھنے ہی کو غلط اور تنگ نظری سے تعبیر کیا جارہا ہے کہ دامنِ عقل کو کبھی تنہا بھی چھوڑ دو کبھی کسی لمحے کے لیے بھی تو مذہب کی جاگیر داری کو ہٹا دو! حالاںکہ مذہب خلافِ فطرت یہ تو مطالبہ نہیں کررہا ہے کہ مزاح اور ہنسی اور خوش طبعی نہ کی جائے بلکہ یہ مطالبہ کررہا ہے کہ ہنسی اور خوش طبعی کے نام پر اعلیٰ اقدار اور اصولوں اور عزت وحرمت کو پامال نہ کیا جائے۔ دائرے میں ہی رہتے ہوئے یہ سب کرنے کی نہ صرف اجازت دی ہے بلکہ اس کو مستحسن قرار دیا ہے اور عملاً پیارے آقا صلی اللہ علیہ وسلم نے اس پر عمل کرکے دکھایا ہے۔

ضرورت اس بات کی ہے کہ اس کی طرف توجہ دی جائے اور حسبِ استطاعت انسانیت، قوم ومعاشرے، خاندان اور اپنے گھر والوں کے دلوں میں مذہب اور اعلیٰ اقدار کی ضرورت وحاکمیت کو راسخ کیا جائے تاکہ دین ومذہب کی افادیت واہمیت برقرار رہے ورنہ کہیں ایسا نہ ہوکہ دوسرے مذاہب کی طرح ہمارا مذہب بھی صرف مسجدوں اور مدرسوں تک محدود ہوکر رہ جائے جس کا بازاروں، شادی بیاہ اور دیگر تقریبات میں کچھ کام نہ ہو۔

{۔۔۔۔۔}