نمازپڑھوصحت مندرہو گے

از:مولانا محمد اسلم رضا

ورزشیں نہ صرف اندرونی اعضا مثلا دل، گردے، جگر، پھیپھڑ ے ، دماغ، آنتوں، معدہ، ریڑھ کی ہڈی، گردن، سینہ اور تمام اقسام کے غدود (GLANDS )کی نشوونما کرتی ہیں بلکہ جسم کو بھی سڈول اور خوبصورت بناتی ہیں۔ ایسی ورزشیں بھی ہیں جن کے ذریعے آدمی غیر معمولی طاقت کا مالک بن جاتا ہے اور ایسی بھی ہیں جن سے چہرے کے نقش ونگار خوبصورت اور حسین نظر آنے لگتے ہیں۔ بڑی عمر کا آدمی ہر ورزش نہیں کرسکتا لیکن نماز ایک ایسا عمل ہے جس پر ہر بندہ آسانی کے ساتھ عمل پیرا ہوسکتا ہے۔ عمر کے ساتھ ساتھ آدمی کی وریدیں (VEINUS)، شریانیں (ARTERIES) اور عضلات کی طاقت کم ہوجاتی ہے اور ان کے اندر ایسے مادے پیدا ہوجاتے ہیں جن کی وجہ سے بے شمار امراض لاحق ہونے لگتے ہیں مثلا گٹھیا، عرق النساء، امراضِ قلب، ہائی بلڈپریشر اور بے شمار دوسرے دماغی امراض۔ ان بے شمار بیماریوں سے نجات پانے کے لیے نماز ہمارے لیے قدرت کا ایک بہترین علاج ہے۔ ورزش کا یہ اصل اصول ہے کہ اگر آپ کسی ورید، شریان یا کسی اور مخصوص عضو کی سختی کو دور کرنا چاہتے ہیں تو سب سے پہلے جسم کو بالکل ڈھیلا چھوڑدیجیے پھر اس حصۂ جسم میں تناؤ پیدا کیجیے اور کچھ دیر تناؤ کی حالت برقرار رکھنے کے بعد جسم کو پھر ڈھیلا چھوڑ دیجیے۔

ماہرینِ ورزش نے ورزش کے اصول وضوابط اور ورزش کے لیے نشستیں بھی متعین کی ہیں۔ہم یہ بات جان چکے ہیں کہ ہمارے پیارے نبی صلی اللہ تعالیٰ علیہ وسلم نے نماز ادا کرنے کے طریقے میں وہ سب سمودیا ہے جس کی نوع انسانی کو ضرورت ہے خواہ وہ ذ ہنی یکسوئی ہو، آلام ومصائب سے نجات پانا ہو، غیب کی دنیا میں سفر ہو، اللہ تعالیٰ کا عرفان حاصل کرنا ہو یا جسمانی صحت ہو، نماز مجموعۂ اوصاف وکمال ہے۔ آئیے تلاش کریں کہ نماز اور ہماری صحت کا آپس میں کیا تعلق ہے۔

ہائی بلڈ پریشر کا علاج

نماز قائم کرنے کے لیے ہم سب سے پہلے وضو کا اہتمام کرتے ہیں۔ وضو کے دوران جب ہم اپنا چہرہ اور کہنیوں تک ہاتھ دھوتے ہیں پیروں اور سرکا مسح کرتے ہیں تو ہمارے اندر دوڑنے والے خون کو ایک نئی زندگی ملتی ہے جس سے ہمیں سکون ملتاہے اور تسکین سے ہمارا سارا اعصابی نظام متاثر ہوتا ہے۔ پرسکون اعصاب سے دماغ کو آرام ملتا ہے۔ اعضائے رئیسہ سر، پھیپھڑے، دل اور جگر وغیرہ کی کارکردگی بحال ہوتی ہے۔ ہائی بلڈ پریشر کم ہوکر نارمل ہوجاتا ہے۔ چہرے پر رونق اورہاتھوں میں رعنائی اور خوبصورتی آجاتی ہے۔ وضو کرنے سے اعصاب کا ڈھیلا پن ختم ہوجاتا ہے۔ آنکھیں پرکشش ہوجاتی ہیں۔ سستی اور کاہلی دور ہوجاتی ہے۔ آپ کبھی بھی تجربہ کرسکتے ہیں۔ ہائی بلڈ پریشر کے مریض کو وضو کرائیں بلڈ پریشر کم ہوجائے گا۔

گٹھیا کا علاج

جب ہم وضو کرنے کے بعد نماز کے لیے کھڑے ہوتے ہیں تو پہلے ہمارا جسم ڈھیلا ہوتا ہے لیکن جب نماز کی نیت کے لیے ہاتھ اٹھاتے ہیں تو قدرتی طور پر جسم میں تناؤ پیدا ہوجاتا ہے۔ اس حالت میں آدمی کے اوپر سے سفلی جذبات کا زور ٹوٹ جاتا ہے۔ سیدھے کھڑے ہونے میں ام الدماغ سے روشنیاں چل کر ریڑھ کی ہڈی سے ہوتی ہوئی پورے اعصاب میں پھیل جاتی ہیں۔ یہ بات سب جانتے ہیں کہ جسمانی صحت کے لیے ریڑھ کی ہڈی کو ایک ممتاز مقام حاصل ہے اور عمدہ صحت کا دارومدار ریڑھ کی ہڈی کی لچک پر ہے۔ نماز میں قیام کرنا گھٹنوں، ٹخنوں اور پیروں سے اوپر پنڈلیوں، پنجوں اور ہاتھ کے جوڑوں کو قوی کرتا ہے۔ گھٹیا کے درد کو ختم کرتا ہے لیکن شرط یہ ہے کہ جسم سیدھا رہے اور ٹانگوں میں خم(ٹیڑھاپن) واقع نہ ہو۔

جگر کے امراض

جھک کر رکوع میں دونوں ہاتھ اس طرح گھٹنوں پر رکھے جائیں کہ کمر بالکل سیدھی رہے اور گھٹنے جھکے ہوئے نہ ہوں۔ اس عمل سے معدے کو قوت پہنچتی ہے، نظامِ ہضم درست ہوتا ہے، قبض دور ہوتا ہے، معدے کی دوسری خرابیاں نیز آنتوں اور پیٹ کے عضلات کا ڈھیلا پن ختم ہوجاتا ہے۔ رکوع کا عمل جگر اور گردوں کے افعال کو درست کرتا ہے۔ اس عمل سے کمر اور پیٹ کی چربی کم ہوجاتی ہے۔ خون کا دوران تیز ہوجاتا ہے۔ چوں کہ دل اور سر ایک سیدھ میں ہوجاتے ہیں اس لیے دل کے لیے خون کو سر کی طرف پمپ (PUMP)کرنے میں آسانی ہوجاتی ہے اور اس طرح دل کا کام کم ہوجاتا ہے اور اسے آرام ملتا ہے جس سے دماغی صلاحیتیں اُجاگر ہونے لگتی ہیں۔

اگر تسبیح سبحان ربی العظیم پر غور کرکے تین سے سات بار تک پڑھی جائے تو مراقبے کی سی کیفیت پیدا ہونے لگتی ہے۔ دورانِ رکوع ہاتھ چوں کہ نیچے کی طرف ہوتے ہیں اس لیے کندھوں سے لے کر ہاتھ کی انگلیوں تک پورے حصے کی ورزش ہوجاتی ہے جس سے بازو کے پٹھے (Muscles) طاقت ورہوجاتے ہیں جو فاسد مادے بڑھاپے کی وجہ سے جوڑوں میں جمع ہوتے ہیں، از خود خارج ہوجاتے ہیں۔

پیٹ کم کرنے کے لیے

رکوع کے بعد سیدھے کھڑے ہوکر سجدے میں جاتے ہیں۔ سجدے میں جانے سے پہلے ہاتھ زمین پر رکھے جاتے ہیں۔ یہ عمل ریڑھ کی ہڈی کو مضبوط اورلچک دار بناتا ہے اور خواتین کے اندرونی اعصاب کوتقویت بخشتا ہے۔ اگر رکوع کے بعد سجدے میں جانے کی حالت میں جلدی نہ کی جائے تو یہ اندرونی جسمانی اعضا کے لیے ایک نعمتِ غیر مترقبہ ورزش ثابت ہوتی ہے۔ سجدے کی حالت ایک ورزش ہے جو رانوں کے زائد گوشت کو گھٹاتی ہے اور جوڑوں کو کھولتی ہے۔ اگر کو لہوں کے جوڑوں میں خشکی آجائے یا چکنائی کم ہوجائے تو اس عمل سے یہ کمی پوری ہوجاتی ہے اور بڑھا ہوا پیٹ کم ہوجاتا ہے۔ متناسب پیٹ سے جسم سڈول اور خوب صورت لگتا ہے۔

السر کا علاج

جن لوگوں کے معدے میں جلن رہتی ہے اور زخم (Ulcer) ہوتاہے توصحیح سجدے کے عمل سے یہ مرض ختم ہوجاتا ہے۔ سجدے میں پیشانی زمین پر رکھی جاتی ہے اس عمل سے دماغ کے اندر دوڑنے والی برقی رو سے براہِ راست اہم رشتہ ہوجاتا ہے اور دماغ کی طاقت میں کئی گنا اضافہ ہوجاتا ہے۔

جملہ دماغی بیماریاں

خشوع وخضوع کے ساتھ دیر تک سجدہ کرنا دماغی امراض کا علاج ہے۔ دماغ اپنی ضرورت کے مطابق خون سے ضروری اجزا حاصل کرکے فاسد مادوں کو خون کے ذریعے گردوں کو واپس بھیج دیتا ہے تاکہ گردے انہیں پیشاب کی شکل میں باہر نکال دیں۔ سجدے سے اٹھتے وقت اس بات کا خاص خیال رکھا جائے کہ سر جھکا ہوا ہو اور بازو سیدھے رہیں اور ان میں قدر ے تناؤ ہو۔ اٹھتے وقت ران پر ہتھیلیاں بھی رکھیں۔ کمر کو کبھی (کب) کی طرح اوپر اٹھائیں اور آہستہ سے کھڑے ہوجائیں یا بیٹھ جائیں۔

چہرے پر جھریاں

ریڑھ کی ہڈی میں حرام مغز بجلی کا ایک ایسا تار ہے جس کے ذریعے پورے جسم کو حیات ملتی ہے۔ سجدہ کرنے سے خون کا بہاؤ جسم کے اوپر ی حصوں کی طرف ہوجاتا ہے جس سے آنکھیں، دانت اور چہرہ سیراب ہوتا رہتا ہے اور رخساروں پر سے جھریاں دور ہوجاتی ہیں۔ یاد داشت صحیح کام کرتی ہے، فہم وفراست میں اضافہ ہوجاتا ہے، آدمی کے اندر تفکر کرنے کی عادت پڑ جاتی ہے، بڑھاپا دیر تک نہیں آتا۔ سو سال کی عمر تک بھی آدمی چلتا پھرتا رہتا ہے اور اس کے اندر ایک برقی رو دوڑتی رہتی ہے جو اعصاب کو تقویت پہنچانے کا سبب بنتی ہے ۔صحیح طریقے پر سجدہ کرنے سے بند نزلہ،ثقلِ سماعت اور سردرد جیسی تکلیفوں سے نجات مل جاتی ہے۔

جنسی امراض

دونوں سجدوں کے درمیان بیٹھنا (جلسہ) گھٹنوں اور پنڈلیوں کو مضبوط بناتا ہے۔ اس کے علاوہ رانوں میں جو پٹھے اللہ تعالیٰ نے افزائش نسل کے لیے بنائے ہیں ان کو ایک خاص قوت عطا کرتا ہے۔ مردانہ اور زنانہ کمزوریاں دور ہوجاتی ہیں تاکہ انسان کی نسلیں دماغی اور جسمانی اعتبار سے صحت مند پیدا ہوں۔ 

سینے کے امراض

نماز کے اختتام پر سلام پھیرتے ہیں۔ گردن پھیرنے کے عمل سے گردن کے عضلات کو طاقت ملتی ہے اور وہ امراض جن کا تعلق ان عضلات سے ہے، لاحق نہیں ہوتے اور انسان ہشاش بشاش اور توانارہتا ہے نیز سینہ اور ہنسی کا ڈھیلا پن ختم ہوجاتا ہے، سینہ چوڑا اور بڑا ہوجاتا ہے۔ ان سب ورزشوں کا فائدہ اس وقت پہنچتا ہے جب ہم نماز پوری توجہ اور دل جمعی اور اس کے پورے آداب کے ساتھ ادا کریں اور جلد بازی سے کام نہ لیں۔

ۘ{۔۔۔۔۔}